Тошкент вилояти Янгийўл туманида алиментдан қарийб 12 миллион сўм қарздорлиги бор эркак турмуш ўртоғини МИБ бўлимида пичоқлагани ҳақида хабар берилганди. Вилоят ҳокимлиги ахборот хизмати аёлнинг ҳозирги аҳволи ҳақида маълумот берди.
Маълум қилинишича, 2021 йил 10 сентябрь куни Янгийўл тиббиёт бирлашмасига 1980 йилда туғилган фуқаро Ш.А. собиқ турмуш ўртоғи билан МИБ бўлимидаги келишмовчилиги оқибатида баданига етказилган оғир тан жароҳатлари билан тез тиббий ёрдам машинасида қабул бўлимига олиб келинган.
«Бемор кўздан кечирилганда ҳушини йўқотган, қўлида, баданида кесилган жароҳатлар мавжудлиги, ташқи қон кетиш аломатлари кузатилиб тургани сабаб зудлик билан жарроҳлик амалиётига олинди. Амалиёт давомида кўздан кечирилганда беморда қон томирлари узилиши аниқлангани ҳисобга олиниб, республика қон-томир жарроҳлари ёрдамга чақирилди.
Ўтказилган жарроҳлик амалиётидан сўнг бемор умумий реанимация бўлимида даво муолажаларини олмоқда. Унда нисбатан ижобий ўзгаришлар кузатилади. Енгил карахтлиги бор, енгил ҳаракатларни бажаришни бошлаган. Соғлиғи тўлақонли тикланмагани сабабли сунъий нафас олдириш аппаратида қолмоқда. Бемор белгиланган стандартлар асосида даволанмоқда», — дейди туман тиббиёт бирлашмаси жонлантириш бўлими мудири Саттор Юсупов.
Эслатиб ўтамиз, Янгийўл туманлараро судининг 2021 йил 20 январдаги ижро варақасига асосан қарздор А.О.дан, ундирувчи Ш.А. фойдасига вояга етмаган 3 нафар фарзанди моддий таъминоти учун даромадининг ярми миқдорида алимент ундириш белгиланган.
Ижро ҳужжати юзасидан олиб борилган мажбурий ижро ҳаракатлари давомида, қарздор алимент тўловларини тўлашдан бўйин товлаб келиб, 2021 йил 10 сентябрь ҳолатига қарздорлиги 11 миллион 864 минг сўмни ташкил этган.
Шу сабабли, ижро ҳаракатлари давомида, давлат ижрочиси Б.Исматиллаев томонидан қарздор О.А.га алимент тўловларини тўлашдан бўйин товлагани сабабли, унга нисбатан Маъмурий жавобгарлик тўғрисидаги кодекснинг 47-4-моддасига (вояга етмаган ёки меҳнатга лаёқатсиз шахсларни моддий таъминлашдан бўйин товлаш) асосан маъмурий жавобгарлик масаласини кўриб чиқиш учун судга тақдим этиши ҳақида маълум қилинган.
Шундан сўнг, 2021 йилнинг 10 сентябрь куни МИБ Янгийўл шаҳар бўлимига қарздор О.А. ва Ш.А. ташриф буюрган.
Давлат ижрочиси ҳужжатларни расмийлаштириш жараёнида, қарздор О.А. ўзи билан яшириб олиб келган ошхона пичоғи билан кутилмаганда ундирувчи Ш.А.га ташланиб, унинг танасининг қўл ва елка қисмларига бир неча тан жароҳати етказган.
Тан жароҳати олган фуқаро Ш.А. зудлик билан тез ёрдам бригадаси орқали шифохонага етказилган.
Мавзуга доир:
Изоҳ (0)