Ижтимоий тармоқ ва интернет сайтлари орқали талабалар турар жойларида жойлар чеклангани, олий таълим муассасалари талабаларга сабабсиз ётоқхоналардан жой бермаётгани ҳақида хабарлар тарқалди.
Ушбу ҳолатларни ўрганиш мақсадида олий ва ўрта махсус таълим вазири Абдуқодир Тошқулов бошчилигида вазирлик масъул раҳбарларидан иборат тезкор гуруҳ бир қатор ОТМ ётоқхоналарида талабаларнинг турмуш тарзи учун яратилган шароитларни кўздан кечирди.
Жумладан, вазир Абдуқодир Тошқулов Тошкент давлат иқтисодиёт университетида бўлиб, университетнинг умумий сиғими 867 ўринга мўлжалланган иккита талабалар турар жойи билан яқиндан танишди ва ёшларга яратилган шароитларни ҳамда ҳудудлардан келаётган талабаларни ётоқхоналарга жойлаштириш ҳолатини ўрганди.
Маълум қилинишича, ҳозирги кунда университетнинг талабалар турар жойида жами 867 нафар талаба яшаши учун тўлиқ шароитлар яратилган бўлиб, бугунги кунгача ётоқхоналарда ҳудудлардан келган 686 нафар талаба, жумладан, 121 нафари имтиёз асосида: шундан, 44 нафари – ногирон, 38 нафари – «темир дафтар», 29 нафари – чин етим жойлаштирилган.
Талабалар турар жойларининг қамровини ошириш юзасидан, хусусан, 2 қаватли каравотлар сонини кўпайтириш эвазига яна кўплаб ўринлар ажратиш мумкинлиги таъкидланиб, шулар бўйича аниқ кўрсатмалар берилди.
Изоҳ (0)