2011-yil 7-sentabr — xokkey tarixidagi qora kun. O‘sha kungi fojia hammani hayratga soldi. Qo‘rqinchli so‘zlar yangradi: “‘Lokomotiv’ quladi”.
“Bugun dahshatli hodisa sodir bo‘ldi. Minskning “Dinamo”siga qarshi o‘yin uchun Yaroslavldan havoga ko‘tarilgan “Lokomotiv” jamoasi samolyoti qulab tushdi”, — titragan ovoz bilan gapirdi KXL prezidenti Aleksandr Medvedev. U “Salavat Yulayev” va “Atlant” o‘rtasidagi ochilish o‘yinini to‘xtatib so‘zga chiqqandi. Fojia mavsum boshlanishidan bir soat oldin yuz berdi.
Tik-tak, tik-tak — butun arena bir daqiqalik sukut saqladi.
Halokat sababi
Yaroslavl—Minsk yo‘nalishida harakatlanishi kerak bo‘lgan “Yak-42” samolyoti 7-sentabr kuni soat 15:58 da uchish yo‘lagida harakatlanishni boshlagan. Uchoq yetarli tezlik ololmadi va uchish yo‘lagidan ham chiqib ketdi. Yo‘lakdan 400 metr o‘tib, ko‘tarila boshladi. Parvoz bir necha soniya davom etdi. Layner 16:00 da yerdan 5—6 metr ko‘tarilgandi, birdaniga chap qanoti radiomayoqqa urildi va Tunoshonki daryosi (Volga yaqinida joylashgan) sohiliga qulab tushdi. Bo‘laklarga bo‘lingan samolyot yona boshladi.Xalqaro aviatsiya qo‘mitasining aviahalokat bo‘yicha izlanishlaridan so‘ng fojianing sababi topildi. Pilotlardan biri uchish vaqtida ongsiz ravishda tormozni bosgan. Keyinchalik gaz bosilishiga qaramasdan, samolyotning ko‘tarilishiga tezlik kamlik qilgan.
44 nafar inson vafot etdi
O‘yinchilar: Stefan Liv, Aleksandr Vyuxin, Pavel Traxanov, Karel Raxunek, Robert Ditrix, Ruslab Saley, Karlis Skrastinsh, Mixail Balandin, Vitaliy Anikeenko, Marat Kalimulin, Yuriy Urichev, Aleksandr Galimov, Yan Marek, Ivan Tkachenko, Aleksandr Vasyunov, Gennadiy Churilov, Nikita Klyukin, Aleksandr Kalyanin, Sergey Ostapchuk, Pavol Demitra, Yozef Vashichhek, Artyom Yarchuk, Andrey Kiryuxin, Daniil Sobchenko.
Murabbiy va xodimlar: Bred Makkrimmon, Aleksandr Karpovsev, Igor Korolyov, Nikolay Krivonosov, Andrey Zimin, Yuriy Baxvalov, Aleksandr Belyayev, Yevgeniy Kunnov, Vyacheslav Kuznetsov, Vladimir Piskunov, Yevgeniy Sidorov.
Ekipaj a’zolari: Andrey Solomensev, Igor Jevelov, Sergey Juravlyov, Yelena Sarmatova, Nadejda Maksumova, Yelena Shilina, Vladimir Matyushkin.
Bu jamoa o‘zi yetishtirgan tarbiyalanuvchilar, xokkey yulduzlari va universal xodimlardan tashkil topgandi. Gagarin Kubogini Yaroslavlga olib kelishi kutilgan murabbiylar shtabi: NHL’da juda ulkan tajribaga ega Karpovsev va Korolyov, “Lokomotiv” bosh murabbiyi, tajribali mutaxassis — Makkrimmon.
40 yoshida ham muvaffaqiyatli faoliyat olib borgan va 2011-yilgi pley-off bahslarida jamoa qahramoniga aylangan Aleksandr Vyuxin. Yoqimli tabassumga ega va qoyilmaqom o‘ynaydigan Stefan Liv.
NHL’da o‘ynagan va o‘z terma jamoalarining sobiq yetakchilari Pavol Demitra, Ruslan Saley va Karlis Skrastinsh. Karel Raxunek, Yozef Vashichek — Yaroslavl xalqining sevimli xokkeychilari va muz ustida yetakchilar. Ular orasida Gagarin Kubogini qo‘lga kiritish uchun yozda Yaroslavlga kelgan Yan Marek ham bor edi. 7-sentabr tongida “temiryo‘lchilar” o‘z maqsadlariga erishish uchun ozgina qolgandi.
Ivan Tkachenko, Aleksandr Galimov, Gennadiy Churilov, Aleksandr Kalyanin, Andrey Kiryuxin — muxlislarning sevimli o‘yinchilari edi. Haqiqiy mehnatsevar, oxirigacha kurashadigan, jamoani ruhlantirib turadigan o‘yinchilar. Bir yil oldin afsonaviy Baffaloning qahramoniga aylangan yoshlar — Yuriy Urichev va Daniil Sobchenko. Urichev jamoa bilan uchishi kerak emasdi, Minskda uning qiladigan ishi yo‘q edi. Birinchidan jarohat, ikkinchidan, bir mavsum avvalgi diskvalifikatsiyasi hali tugamagan edi. Lekin u jamoa bilan birga bo‘lishni istagandi.
Samolyotga chiqishidan sal oldin kasallik bilan kurashayotgan qizga pul o‘tkazib bergandi
“Lokomotiv” xokkeychisi Ivan Tkachenko 2007-yildan buyon xayriya ishlariga bosh qo‘shib kelgan. Lekin hech qachon o‘z ismini oshkor qilmagan. Ivan Leonidovich nomi ostida har oy muhtojlarga pul o‘tkazardi. To‘rt yarim yil mobaynida Ivan 9 996 300 rubl xayriya qilgani hisoblab chiqilgan. Uning pullari juda ko‘plab muhtojlarga yordam bergan.Ivan vafotidan 15 daqiqa avval rak bilan davolanayotgan 16 yoshli Diana Ibragimova hisobiga 500 ming rubl o‘tkazib yuborgandi. Tkachenko bundan avval ham xayriya ishlari bilan shug‘ullanib kelgan.
“Yolg‘iz qo‘ymanglar, men bilan gaplashinglar”
Aviahalokat natijasida ikki kishi tirik qoladi. Biri — bortinjener Aleksandr Sizov, yana biri — “Lokomotiv” hujumchisi Aleksandr Galimov. Shifoxonaga olib ketilayotgan Galimov jon holatda baqirardi: “Yolg‘iz qo‘ymanglar, men bilan gaplashinglar”. Xokkeychi shifoxonaga yotqizildi. Unga og‘riq qoldiruvchi dorilar berildi. Rafiqasi, ota-onasi, qaynonasiga uning yoniga kirishiga ruxsat berildi.
Shifokorlarning sa’y-harakatlariga qaramasdan, hujumchi oradan besh kun o‘tib vafot etdi. Tanasining 80 foizi kuyib ketgan edi. Barcha uning yashab qolishiga umid qilgandi…
Aviahalokatda tirik qolgan yagona inson — Aleksandr Sizov
Parvoz qilayotganlardan kimdir mendan ‘nega uchmayapmiz?’, deb so‘ragan vaqtda o‘zimga keldim. Illyuminatorga qaradim. Samolyot harakatlanayotgani ko‘rinib turgandi. 5—7 soniyadan so‘ng samolyot osmonga ko‘tarildi. Lekin u to‘g‘ri emas, burni osmonga qaragan ravishda ucha boshladi.Hamma narsa silkina boshladi: bo‘linmalar, panellar. Va tamom. Keyin qattiq urilgan tovush eshitildi. Undan so‘ng nima bo‘lganini bilmayman.
Aleksandr Sizov, bortinjener
Xokkey olamida eng yuqori cho‘qqini ko‘zlaganlar 7-sentabr kuni umrbod osmonda qoldi...
Ma’rufjon Ochilov tarjimasi
Izoh (0)