Braziliya va Argentina terma jamoalari o‘rtasidagi o‘yin to‘xtatildi. Politsiya 4 futbolchini olib ketishga urindi

JCh—2022 saralashi doirasida o‘tishi belgilangan Braziliya va Argentina terma jamoalari o‘rtasidagi 5-sentabr kungi o‘yin 10-daqiqadayoq to‘xtatildi.

Braziliya politsiyasi Argentina safida harakat qilayotgan 4 futbolchi — Emiliano Martines, Emiliano Buendia (ikkisi “Aston Villa”), Jovanni lo Chelso va Kristian Romeroni (ikkisi “Tottenhem”) maydondan olib chiqib ketmoqchi bo‘ldi.

Braziliya sog‘liqni nazorat qilish tashkiloti (Anvisa) qaroriga ko‘ra, mamlakatda Buyuk Britaniyadan kelgan fuqarolar uchun 14 kunlik karantin joriy qilingan. Anvisa’ning qayd etishicha, yuqorida ismlari keltirilgan futbolchilar hukumatni Buyuk Britaniyaga yaqin orada bormagani haqidagi soxta hujjat bilan aldashga uringan.

Anvisa tartibbuzarlarni ushlash va deportatsiya qilishni so‘rab, politsiyaga murojaat qilgan. Biroq politsiya xodimlari mehmonxonaga borgan vaqtda futbolchilar o‘yinga jo‘nab ketib bo‘lgan.

Martines, Lo Chelso va Romero Braziliyaga qarshi o‘yinda asosiy tarkibda maydonga tushgandi.

“Hakamning qaroriga ko‘ra Braziliya va Argentina terma jamoalari o‘rtasidagi o‘yin qoldirildi. Hakam va komissar FIFA tartib-intizom qo‘mitasiga hisobot yuboradi va shundan keyin tegishli choralar ko‘riladi.

Saralash bosqichi — FIFA musobaqasi. Tashkilotchilik va rivojlantirish bo‘yicha barcha qarorlar ushbu tashkilot tomonidan chiqariladi”, — deyiladi KONMEBOL bayonotida.