2011 йил 7 сентябрь — хоккей тарихидаги қора кун. Ўша кунги фожиа ҳаммани ҳайратга солди. Қўрқинчли сўзлар янгради: «‘Локомотив’ қулади».
«Бугун даҳшатли ҳодиса содир бўлди. Минскнинг «Динамо»сига қарши ўйин учун Ярославлдан ҳавога кўтарилган «Локомотив» жамоаси самолёти қулаб тушди», — титраган овоз билан гапирди КХЛ президенти Александр Медведев. У «Салават Юлаев» ва «Атлант» ўртасидаги очилиш ўйинини тўхтатиб сўзга чиққанди. Фожиа мавсум бошланишидан бир соат олдин юз берди.
Тик-так, тик-так — бутун арена бир дақиқалик сукут сақлади.
Ҳалокат сабаби
Ярославль—Минск йўналишида ҳаракатланиши керак бўлган «Як-42» самолёти 7 сентябрь куни соат 15:58 да учиш йўлагида ҳаракатланишни бошлаган. Учоқ етарли тезлик ололмади ва учиш йўлагидан ҳам чиқиб кетди. Йўлакдан 400 метр ўтиб, кўтарила бошлади. Парвоз бир неча сония давом этди. Лайнер 16:00 да ердан 5—6 метр кўтарилганди, бирданига чап қаноти радиомаёққа урилди ва Туношонки дарёси (Волга яқинида жойлашган) соҳилига қулаб тушди. Бўлакларга бўлинган самолёт ёна бошлади.Халқаро авиация қўмитасининг авиаҳалокат бўйича изланишларидан сўнг фожианинг сабаби топилди. Пилотлардан бири учиш вақтида онгсиз равишда тормозни босган. Кейинчалик газ босилишига қарамасдан, самолётнинг кўтарилишига тезлик камлик қилган.
44 нафар инсон вафот этди
Ўйинчилар: Стефан Лив, Александр Вюхин, Павел Траханов, Карел Рахунек, Роберт Дитрих, Руслаб Салей, Карлис Скрастинш, Михаил Баландин, Виталий Аникеенко, Марат Калимулин, Юрий Уричев, Александр Галимов, Ян Марек, Иван Ткаченко, Александр Васюнов, Геннадий Чурилов, Никита Клюкин, Александр Калянин, Сергей Остапчук, Павол Демитра, Йозеф Вашишек, Артём Ярчук, Андрей Кирюхин, Даниил Собченко.
Мураббий ва ходимлар: Бред Маккриммон, Александр Карповсев, Игорь Королёв, Николай Кривоносов, Андрей Зимин, Юрий Бахвалов, Александр Беляев, Евгений Куннов, Вячеслав Кузнецов, Владимир Пискунов, Евгений Сидоров.
Экипаж аъзолари: Андрей Соломенцев, Игорь Жевелов, Сергей Журавлёв, Елена Сарматова, Надежда Максумова, Елена Шилина, Владимир Матюшкин.
Бу жамоа ўзи етиштирган тарбияланувчилар, хоккей юлдузлари ва универсал ходимлардан ташкил топганди. Гагарин Кубогини Ярославлга олиб келиши кутилган мураббийлар штаби: НҲЛда жуда улкан тажрибага эга Карповцев ва Королёв, «Локомотив» бош мураббийи, тажрибали мутахассис — Маккриммон.
40 ёшида ҳам муваффақиятли фаолият олиб борган ва 2011 йилги плей-офф баҳсларида жамоа қаҳрамонига айланган Александр Вюхин. Ёқимли табассумга эга ва қойилмақом ўйнайдиган Стефан Лив.
НҲЛъда ўйнаган ва ўз терма жамоаларининг собиқ етакчилари Павол Демитра, Руслан Салей ва Карлис Скрастинш. Карел Рахунек, Йозеф Вашичек — Ярославль халқининг севимли хоккейчилари ва муз устида етакчилар. Улар орасида Гагарин Кубогини қўлга киритиш учун ёзда Ярославлга келган Ян Марек ҳам бор эди. 7 сентябрь тонгида «темир йўлчилар» ўз мақсадларига эришиш учун озгина қолганди.
Иван Ткаченко, Александр Галимов, Геннадий Чурилов, Александр Калянин, Андрей Кирюхин — мухлисларнинг севимли ўйинчилари эди. Ҳақиқий меҳнатсевар, охиригача курашадиган, жамоани руҳлантириб турадиган ўйинчилар. Бир йил олдин афсонавий Баффалонинг қаҳрамонига айланган ёшлар — Юрий Уричев ва Даниил Собченко. Уричев жамоа билан учиши керак эмасди, Минскда унинг қиладиган иши йўқ эди. Биринчидан жароҳат, иккинчидан, бир мавсум аввалги дисквалификацияси ҳали тугамаган эди. Лекин у жамоа билан бирга бўлишни истаганди.
Самолётга чиқишидан сал олдин касаллик билан курашаётган қизга пул ўтказиб берганди
«Локомотив» хоккейчиси Иван Ткаченко 2007 йилдан буён хайрия ишларига бош қўшиб келган. Лекин ҳеч қачон ўз исмини ошкор қилмаган. Иван Леонидович номи остида ҳар ой муҳтожларга пул ўтказарди. Тўрт ярим йил мобайнида Иван 9 996 300 рубль хайрия қилгани ҳисоблаб чиқилган. Унинг пуллари жуда кўплаб муҳтожларга ёрдам берган.Иван вафотидан 15 дақиқа аввал рак билан даволанаётган 16 ёшли Диана Ибрагимова ҳисобига 500 минг рубль ўтказиб юборганди. Ткаченко бундан аввал ҳам хайрия ишлари билан шуғулланиб келган.
«Ёлғиз қўйманглар, мен билан гаплашинглар»
Авиаҳалокат натижасида икки киши тирик қолади. Бири — бортинженер Александр Сизов, яна бири — «Локомотив» ҳужумчиси Александр Галимов. Шифохонага олиб кетилаётган Галимов жон ҳолатда бақирарди: «Ёлғиз қўйманглар, мен билан гаплашинглар». Хоккейчи шифохонага ётқизилди. Унга оғриқ қолдирувчи дорилар берилди. Рафиқаси, ота-онаси, қайнонасига унинг ёнига киришига рухсат берилди.
Шифокорларнинг саъй-ҳаракатларига қарамасдан, ҳужумчи орадан беш кун ўтиб вафот этди. Танасининг 80 фоизи куйиб кетган эди. Барча унинг яшаб қолишига умид қилганди…
Авиаҳалокатда тирик қолган ягона инсон — Александр Сизов
Парвоз қилаётганлардан кимдир мендан ‘нега учмаяпмиз?’, деб сўраган вақтда ўзимга келдим. Иллюминаторга қарадим. Самолёт ҳаракатланаётгани кўриниб турганди. 5—7 сониядан сўнг самолёт осмонга кўтарилди. Лекин у тўғри эмас, бурни осмонга қараган равишда уча бошлади.Ҳамма нарса силкина бошлади: бўлинмалар, панеллар. Ва тамом. Кейин қаттиқ урилган товуш эшитилди. Ундан сўнг нима бўлганини билмайман.
Александр Сизов, бортинженер
Хоккей оламида энг юқори чўққини кўзлаганлар 7 сентябрь куни умрбод осмонда қолди...
Маъруфжон Очилов таржимаси
Изоҳ (0)