O‘zbekiston milliy terma jamoasi bosh murabbiyi Srechko Katanes Shvetsiyaga qarshi kechgan o‘rtoqlik o‘yinidagi mag‘lubiyatdan (1:2) so‘ng o‘z fikrlari bilan o‘rtoqlashdi. Bu haqda “Championat.asia” xabar qilmoqda.
O‘yin haqidaBirinchi navbatda Shvetsiya terma jamoasini g‘alaba bilan tabriklayman. O‘yinga keladigan bo‘lsak, men 7 kundan beri O‘zbekistondaman. Jamoa ushbu o‘yinda ko‘rsatgan natijadan qoniqdim. Biz juda yaxshi o‘ynadik. Albatta, ba’zi xatolarga ham yo‘l qo‘ydik, bu esa normal holat.
Jamoamizda yosh o‘yinchilar juda ko‘p. Endi bu yoshlar bilan yangi jamoa qurishimiz kerak. Umuman olganda bizda bor o‘yinchilar va ularning o‘yinidan qoniqish hosil qildim. Kelajakda ham shu ruhda davom etishimiz kerak. Kuchli jamoalar bilan kuchli o‘yinlar ko‘rsatish lozim.
Shvetsiya terma jamoasi haqida
Bu jamoa bir necha yildan beri yuqori darajada o‘yin ko‘rsatib kelmoqda. Bizga qarshi ikkinchi tarkib o‘ynagan bo‘lsa ham, ular juda ajoyib o‘yin namoyish qildi. Shvetsiya bir necha kun oldin Ispaniyani mag‘lub etdi. Bu biz uchun ajoyib tajriba bo‘ldi, albatta.
Markaziy himoyadagi xatolar haqida
Bunga normal qarayman, hamma ham xato qiladi. Ular biroz agressivroq bo‘lishini xohlagan bo‘lardim. Nafaqat himoya, balki butun jamoa agressiv o‘ynashi lozim. Men ko‘rgan kamchilik aynan shundan iborat, ya’ni agressiv o‘yinning yo‘qligi.
Jamoamiz bir oz sekin harakat qildi, qanot futbolchilarida ham aynan shu kamchilik sezildi. Ammo qaytaraman, jamoani o‘yinidan to‘liq qoniqdim. Jismoniy tarafdan juda kuchli bo‘lgan Shvetsiya terma jamoasiga qarshilik ko‘rsatish himoyachilarimizga oson bo‘lgani yo‘q. Men ularni tabriklayman. O‘yinimizdan xotirjamman. Hech qanday xavotirlanadigan narsa yo‘q. Osiyo va Yevropada o‘yin uslublari har xil, bizda bir oz sekin futbol o‘ynaladi. Yosh o‘yinchilarga kelsak, biz ularga ko‘proq imkoniyat berishimiz kerak, ularga o‘sish uchun aynan o‘yin amaliyoti zarur.
Eldor Suyunov va hozirda eng munosib darvozabon haqida
To‘g‘risi, aniq bilmayman. Ha, u bir nechta ajoyib seyvlar ko‘rsatdi. Lekin jamoani to‘liq o‘rganishga ulgurmadim. Milliy jamoa bilan bir nechta mashg‘ulotlar o‘tkazdim, xolos. Murabbiy biror qarorga kelishi uchun ozroq vaqt kerak bo‘ladi. Darvozabon yoki boshqa masalalarda biror aniq fikr aytish uchun yetti kun juda kamlik qiladi.
Shvetsiya Ispaniyani ham 2:1 hisobida yutgani borasida
Ha, albatta, biz Ispaniya bilan bir xil natija qayd etdik (kuladi). Hazil, albatta. Shvetsiya terma jamoasiga kelajakdagi o‘yinlarda omad tilayman. Ular bugun jiddiy o‘yin ko‘rsatdi. Omad. Hammaga rahmat.
Srechko Katanes, O‘zbekiston terma jamoasi bosh murabbiyi
Izoh (0)