Qirg‘izistonning sobiq bosh vaziri Omurbek Babanov Moskvada jarrohlik operatsiyasini boshdan o‘tkazganidan so‘ng, 5-sentabr kuni Qirg‘izistonga qaytib keldi. Bu haqda siyosatchiga yaqin manbalarga tayanib, Kloop nashri xabar berdi.
“U o‘zini yaxshi his qilyapti, sog‘lig‘i qayta tiklanmoqda ”, — dedi manbalar.
Sobiq bosh vazir Babanov 5-avgust kuni Moskvaga uchib ketgandi. U chet elda davolanish uchun GKNB (Qirg‘iziston Respublikasi Milliy xavfsizlik davlat qo‘mitasi) qamoqxonasidan ozod qilingan. Ma’lum bo‘lishicha, Qirg‘izistonda siyosatchiga tashxis qo‘yishning imkoni bo‘lmagan.
Babanov nima uchun qamoqda edi?
“Respublika” partiyasi yetakchisi Omurbek Babanov 2017-yilda prezidentlikka nomzodini qo‘yishini e’lon qildi. U butun saylov kampaniyasi davomida mamlakatning o‘sha paytdagi rahbari Almazbek Atambayev qo‘llab-quvvatlagan So‘ronboy Jeenbekovning asosiy raqibi edi.
Qirg‘izistonning eng boy odamlardan biri Omurbek Babanov 2017-yildan Moskvada yashagan va 2019-yilda mamlakatga qaytib kelib, siyosatga qaytmaslikka va’da bergan. Babanovning so‘zlariga ko‘ra, ushbu va’dasi uchun hukumat unga qarshi ochilgan jinoiy ishni to‘xtatishga va’da bergan.
2021-yil 24-martda Milliy xavfsizlik davlat qo‘mitasi Omurbek Babanovga qarshi sudga oshirilgan ishlar to‘xtatilganini ma’lum qildi. Shu bilan birga, Babanov “ixtiyoriy yordam sifatida” davlat budjetiga 100 million som (qariyb 1,2 million dollar) xayriya qiladigan bo‘ldi.
GKNB ta’kidlashicha, Omurbek Babanov va uning qarindoshlari o‘z xatti-harakatlari bilan davlat, yuridik shaxslar va fuqarolarning manfaatlariga zarar yetkazishiga oid dalillar topilmagan. Biroq 31-may kuni GKNB Babanovni hibsga oldi, bu safar u “Qumtor” loyihasini amalga oshirishda korrupsiyaga yo‘l qo‘yganlikda ayblandi.
Siyosatchining o‘zi uning hibsga olinishini “butunlay nohaqlik” deb atadi va o‘zini aybdor deb hisoblamasligini aytdi.
27-iyul kuni Bishkekning Pervomayskiy tuman sudi Babanovga nisbatan ehtiyot chorasini o‘zgartirib, unga chet elga uchishga ruxsat berdi. Milliy xavfsizlik davlat qo‘mitasi xabariga ko‘ra, siyosatchining sog‘lig‘i yomonlashgani munosabati bilan shunday qaror qabul qilingan.
Bungacha OAVda Babanov GKNB tergov izolyatoridan “Avitsenna” xususiy klinikasiga o‘tkazilgani haqida xabarlar tarqalgandi.
Izoh (0)