G‘arbiy Afrikada joylashgan Gvineya Respublikasida 5-sentabr kuni davlat to‘ntarishi uyushtirgan harbiy isyonchilar endilikda butun mamlakat bo‘ylab 20:00 dan keyin komendantlik soati joriy etilganini e’lon qildi. Bu haqda France Press agentligiga tayanib, “TASS” xabar berdi.
Agentlik ma’lumotiga ko‘ra, isyonchilar ushbu chora “keyingi bildirishnomaga qadar” amalda bo‘lishini aytgan. Shuningdek, ular hududlardagi gubernatorlar va rahbarlar o‘z o‘rnini harbiylarga bo‘shatib berishini ma’lum qilgan.
5-sentabr kuni kechqurun Gvineya milliy televideniyesida e’lon qilingan ikkinchi bayonotga ko‘ra, isyonchi harbiylar vazirlar va muassasalar rahbarlarini 6-sentabr kuni mahalliy vaqt bilan 11:00 (Toshkent vaqti bilan 16:00) poytaxt Konakrida bo‘ladigan yig‘ilishga chaqirgan.
Shuningdek, ushbu bayonotda Gvineya harbiylari tomonidan tuzilgan Birlashish va taraqqiyot milliy qo‘mitasi tinch aholi va ularning mol-mulki xavfsizligini ta’minlash choralarini ko‘rishga va’da berdi.
“Fuqarolarning xavfsizligi, shuningdek, ularning mol-mulki xavfsizligini ta’minlash uchun barcha choralar ko‘riladi”, — deyiladi hujjatda. Qo‘mita rahbari, polkovnik Mamadi Dumbuya “yo‘l nazoratchilari va politsiya xodimlariga qoidalarga amal qilishni ta’minlashni” buyurdi.
“Biz milliy va xalqaro hamjamiyatni ishontirib aytamizki, sobiq prezidentning (Alfa Konde) jismoniy va ruhiy salomatligiga ta’sir o‘tkazilmaydi. Biz uning tibbiy xizmatlardan foydalanishini va shifokorlari bilan aloqada bo‘lishini ta’minlash uchun barcha choralarni ko‘rdik ”, — deya ta’kidlanadi qo‘mita bayonotida.
Gvineyada 5-sentabr, yakshanba kuni ertalab prezident Alfa Konde qarorgohi yaqinida otishma yuz berdi.
Jeune Afrique ma’lumotlariga ko‘ra, polkovnik Mamadi Dumbuya rahbarligidagi GPS maxsus topshiriqli bo‘linma jangchilari o‘t ochgan. Reuters’ga xabar bergan guvohlar so‘zlariga ko‘ra, harbiylar mamlakat poytaxti Konakri ko‘chalarida patrullik qilmoqda. Shuningdek, agentlik manbasi ma’lum qilishicha, prezident qarorgohi va bir nechta vazirliklar binolari joylashgan tumanga olib boradigan yagona ko‘prik harbiylar tomonidan to‘sib qo‘yilgan.
Prezident Alfa Konde jabr ko‘rmagan, deya agentlikka yuqori mansabli amaldor ma’lum qilgan, ammo boshqa tafsilotlarni oshkor qilmagan. Keyinroq prezident Alfa Konde davlat to‘ntarishi uyushtirgan bir guruh harbiylar tomonidan qo‘lga olingani haqida xabar berildi.
Qo‘zg‘olonchilar yetakchisi polkovnik Mamadi Dumbuya mamlakatda konstitutsiya amal qilishdan to‘xtaganini va chegaralar yopilganini e’lon qildi.
Izoh (0)