Global isish va abadiy muzlikning erishi noma’lum viruslarning “uyg‘onishi”ga olib kelishi mumkin, bu esa insoniyat uchun oldindan aytib bo‘lmaydigan oqibatlarni keltirib chiqaradi, dedi tinchlik bo‘yicha Nobel mukofoti sovrindori Raye Kvon Chung.
Uning so‘zlariga ko‘ra, “ibtidoiy davrda yoki yuz minglab yil avval mavjud bo‘lgan” qaysi virus yana paydo bo‘lishini bashorat qilib bo‘lmaydi.
“Ular qaytadi. Ishonchim komilki, biz ilgari hech qachon to‘qnash kelmagan juda turli-tuman viruslar mavjud”, — dedi olim.
Uning fikricha, xavf zonasida Sibir ham bo‘lib, u yerda tayga va tundra muzliklarining erishi tufayli, qadimiy kasalliklar va viruslar “uyg‘onishi” mumkin. Insoniyat bunday sinovlarga tayyor turishi va ularga tezkorlik bilan javob qaytarishi kerak, deya xulosa qildi Raye Kvon Chung.
U 2007-yilda Iqlim o‘zgarishi bo‘yicha hukumatlararo ekspertlar guruhi tarkibida Nobel mukofotiga sazovor bo‘lgan edi. Mukofot inson faoliyati oqibatida iqlim o‘zgarishi haqidagi bilimlarni to‘plash va tarqatish bo‘yicha sa’y-harakatlar uchun berilgandi.
Avvalroq Birlashgan Millatlar Tashkilotining Iqlim o‘zgarishi bo‘yicha hukumatlararo guruhi ko‘plab iqlim o‘zgarishlari doimiy bo‘lib qolishi haqida ogohlantiruvchi hisobot e’lon qilgan edi. Hisobotga ko‘ra, “kuzatilgan ko‘plab iqlim o‘zgarishlari minglab, hatto yuz ming yillar davomida misli ko‘rilmagan darajada”, boshlangan ko‘plab o‘zgarishlarni esa masalan, dengiz sathining ko‘tarilishini, “yuz ming yillar davomida qaytarib bo‘lmaydi”.
Shuningdek, olimlar Arktikada havo harorati sayyoraning boshqa mintaqalariga qaraganda tezroq qiziyotganini ma’lum qilgandi. Bu jarayon esa sayyoradagi ob-havo uchun salbiy oqibatlarga olib kelishi mumkin.
Izoh (0)