Ispaniyalik Sebastyan Rodriges Velozu terrorchilik va qotillikda ayblanib, 84 yilga ozodlikdan mahrum qilinganida 28 yoshda edi. Hozir u 64 yoshda va 2021-yilning 26-avgustida Tokio—2020 Paralimpiadasida 4x50 metrga suzish bo‘yicha musobaqada qatnashdi.
“Men xatolar ham maqsadga olib kelishi mumkinligi va boshqalarga xato qilmaslikka yordam berishning misoliman. O‘zimni namunali qilib ko‘rsatishga da’vo qilmayman, ammo o‘tmishdan saboq chiqaraman, bugungi kun bilan yashayman va kelajak uchun mehnat qilaman”, – deydi Rodriges.
Sebastyan Rodriges o‘tmishi haqida gapirishni xush ko‘rmaydi. U Ispaniyaning janubi-g‘arbidagi Kadis shahrida tug‘ilgan. 1980-yillarda Ispaniyaning antifashistik so‘l-radikal inqilobiy tashkilotining a’zosi bo‘lgan. Tashkilot 1975-yilda tashkil etilgan bo‘lib, o‘n yildan ziyod vaqt mobaynida guruh a’zolari Ispaniyada otishmalar, portlashlar va boshqa turdagi hujumlarni uyushtirib kelgan. Ushbu hujumlar natijasida kamida 80 kishi halok bo‘lani aytiladi. Yevropa Ittifoqi ushbu tashkilotni terrorchilar ro‘yxatiga kiritgan.
Sebastyan Rodriges portlashlar seriyasini uyushtirishda, shuningdek, 1984-yilda kitob do‘konida sodir bo‘lgan sevilyalik biznesmen Rafael Paduranining o‘ldirilishida ishtirok etgan. Faqatgina oradan bir yil o‘tib, 1985-yilda politsiya uni qo‘lga olishga muvaffaq bo‘ladi.
1990-yilda Rodriges qamoqdaligida terroristik tashkilotdagi sheriklarining ham jazoni u bilan bir xil, axloq tuzatish muassasasida o‘tashini talab qilib, ochlik e’lon qiladi. Ochlik 432 kun davom etadi. Natijada unda paraplegiya (ba’zida harakatlanishning yo‘qolishiga olib keladigan nevrologik kasallik) rivojlanib, yurish qobiliyatini yo‘qotadi va nogironlar aravachasida harakatlanishga majbur bo‘ladi.
To‘rt yil o‘tib, 1994-yilda u Ispaniya qonunlarida og‘ir kasallikka chalingan mahbuslarni shartli ravishda ozod qilish nazarda tutilgani uchun qamoqdan chiqariladi. Ozodlikka chiqqach, Rodriges nogironlar aravachasida basketbol o‘ynashga va suzish sport turiga qiziqib qoladi. Rodrigesning aytishicha, u suzishni bolaligida, uch yoshida o‘rgangan. Sebastyan 2000-yilda Sidneydagi Paralimpiya o‘yinlarida suzuvchi sifatida ishtirok etib, birdaniga to‘rtta paralimpiya rekordini o‘rnatadi va naq beshta oltin medalni qo‘lga kiritadi.
Rodrigesning Paralimpiya o‘yinlarida ishtirok etishi ham ko‘plab bahs-munozaralarga sabab bo‘ladi, chunki u Ispaniya rasmiylariga avtohalokat natijasida imkoniyatim cheklangan deb yolg‘on gapirgandi. Shundan so‘ng uni hatto medallardan mahrum qilish taklif qilinadi, lekin Xalqaro paralimpiya qo‘mitasi boshqacha qaror qabul qiladi. “Ispaniya hukumati unga pasport berdi, chunki ular uning jinoyat sodir etganidan va qamoqda vaqt o‘tkazganidan xavotir olmagan. Avstraliya hukumati esa unga viza berdi. Ularning ham undan xavotir olmagani shubhasiz”, – deya izoh bergandi o‘sha paytda qo‘mita vakili.
“Barcha menga istaganicha hukm chiqarishi mumkin. O‘tmish ortda qoldi va uni o‘chirib bo‘lmaydi”, – degan Sebastyan Afina Paralimpiadasida. O‘shanda u yana uchta oltin medalni qo‘lga kiritadi va Ispaniyaning ilk sakkiz karra Paralimpiya chempioni bo‘ladi. 2015-yilda esa Ispaniya hukumati uni rasman afv etadi.
Sebastyan Rodriges uchun Tokiodagi Paralimpiya o‘yinlari unchalik muvaffaqiyatli o‘tmadi. 200 metrga suzishning final bahslarida u sakkizinchi bo‘ldi, 4×50 metrga aralash estafetasida esa beshinchi. Ammo Rodriges bundan tushkunlikka tushgani yo‘q, Tokiodagi o‘yinlarga kelish uning orzusi bo‘lgan. “Yosh – muammo emas. Xuddi eng yaxshi paytlarimdagidek suzyapman. Ammo yangi avlod (sportchilar) mendan kuchliroq va ular yaxshiroq tayyorlanmoqda, shuning uchun ular tezroq suzyapti”, – degandi Rodriges bundan bir necha yil oldin.
Izoh (0)