Dunyo va o‘zbek sportiga oid 4-sentabr kunining muhim xabarlari dayjesti bilan tanishing.
O‘zbekiston
Tokio shahrida Paralimpiya o‘yinlari o‘tkazilmoqda. 4-sentabr kuni 6 nafar o‘zbekistonlik sportchi musobaqada ishtirok etdi va ikkita medal qo‘lga kiritildi.Nurxon Qurbonova para-yengil atletikaning F54 toifasida nayza uloqtirish bahslarida kumush medalga sazovor bo‘ldi. Qayd etish o‘rinli, Nurxon Qurbonova Tokio—2020 Paralimpiya o‘yinlarining yadro uloqtirish sektorida bronza medaliga sazovor bo‘lgan edi. Shu tariqa u o‘zining musobaqadagi ikkinchi medalini qo‘lga kiritdi.
Para-taekvondochi Guljanoy Raimova esa +58 kg vazn toifasida oltin medal uchun bahsda braziliyalik Menezes Bezyerrani 8:4 hisobida mag‘lubiyatga uchratdi.
Shu tariqa O‘zbekiston delegatsiyasi Tokio—2020 Paralimpiya o‘yinlaridagi ishtirokini yakunladi. Delegatsiya umumiy hisobda 19 ta medal (8 ta oltin, 5 ta kumush va 6 ta bronza) jamg‘ardi. Musobaqa 5-avgust kuni o‘z yakuniga yetadi.
Moldovaning “Sherif” klubi Jasur Yaxshiboyevni Yevropa Chempionlar Ligasi uchun ro‘yxatdan o‘tkazdi. O‘zbekistonlik yarim himoyachi 17-raqam ostida harakat qiladi.
Eslatib o‘tamiz, “Sherif” Chempionlar Ligasining guruh bosqichida “Real”, “Inter” va “Shaxtyor” klublari bilan kuch sinashadi.
Avvalroq “Sherif”ning Yaxshiboyevni ijaraga olgani haqida xabar berilgandi.
O‘zbekiston futzal terma jamoasi 12-sentabrdan 3-oktabrgacha Litvada bo‘lib o‘tadigan Jahon chempionatida ishtirok etadi. O‘zbekiston B guruhidan joy olgan bo‘lib, keyingi bosqichga chiqish uchun Misr, Gvatemala va Rossiya Futbol ittifoqi (Rossiya) bilan kuch sinashadi.
O‘FA matbuot xizmati mazkur musobaqada O‘zbekiston sharafini himoya qiladigan futzalchilar va guruh bosqichidagi o‘yinlar sanasini ma’lum qildi.
Futzal, Jahon Chempionati
B guruhi
1-tur, 12-sentabr
20:00. O‘zbekiston – Gvatemala
2-tur, 15-sentabr
22:00. O‘zbekiston – RFI
3-tur, 18-sentabr
20:00. Misr – O‘zbekiston
O‘zbekiston terma jamoasi tarkibi:
Darvozabonlar:
Rustam Umarov (“OKMK”)Ravshan Eliboyev (“Paxtakor”)Abbos Elmurodov (“Xuaxin Jizzax”)
O‘yinchilar:
Anasxon Rahmatov (“OKMK”)Mashrab Odilov (“Paxtakor”)Ixtiyor Ropiyev (“Xuaxin Jizzax”)Muzaffar Ahadjonov (“OKMK”)Shahzodjon Sa’diyev (“OKMK”)Xushnur Erkinov (“Xuaxin Jizzax”)Ilhom Hamroyev (“Xuaxin Jizzax”)Husniddin Nishonov (“Xuaxin Jizzax”)Dilshod Rahmatov (“Xuaxin Jizzax”)Davron Choriyev (“Xuaxin Jizzax”)Sunnatilla Jo‘rayev (“Paxtakor”)Elbek To‘lqinov (“Xuaxin Jizzax”)Akbar Usmonov (“Paxtakor”).
Jahon
“Manchester Yunayted” hujumchisi Krishtianu Ronaldu Manchesterga yetib keldi. 36 yoshli portugaliyalikni sobiq jamoadoshi, hozirda “qizil iblislar”ning texnik direktori sifatida ishlab kelayotgan Darren Fletcher kutib oldi.
Ronaldu bungacha Portugaliya terma jamoasi ixtiyorida edi. Ronaldu endilikda “Manchester Yunayted” mashg‘ulotlariga qo‘shilishdan oldin 5 kunlik karantindan o‘tishi kerak bo‘ladi.
Hujumchi Radamel Falkao La Ligaga qaytdi. Kolumbiyalik futbolchi “Galatasaroy”ni tark etib, “Rayo Valyekano” bilan shartnoma imzoladi.
35 yoshli futbolchining ispan klubi bilan 1+1 ko‘rinishida shartnoma imzolagani aytilmoqda.
“Manchester Yunayted” hujumchisi Meyson Grinvud Angliya Premyer Ligasining avgust oyidagi eng yaxshi o‘yinchisi deb topildi.
19 yoshli futbolchi ortda qolgan oyda 3 o‘yinda maydonga tushib, 3 ta gol urgandi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)