Kanadadagi oltin oldi-sotdisi bilan shug‘ullanuvchi Kitco kompaniyasi “Muruntov” konini dunyo bo‘ylab oltin qazib olinadigan eng yirik konlarning navbatdagi ro‘yxatiga qo‘shmadi. Bu haqda kompaniyaning so‘nggi hisobotiga tayanib, Spot xabar berdi.
Kitco’ning tushuntirishicha, kon bo‘yicha ma’lumotlar yetarli emas. Rasmiy ma’lumotlar oldin ham yo‘q edi, biroq kompaniya “Muruntov”ni taxminiy ma’lumotlar asosida baholagan.
Masalan, 2020-yil yakunlari bo‘yicha Kitco “Muruntov”ni birinchi o‘ringa qo‘ygandi — bu yerda 2020-yilda 56,7 tonna oltin (2 million unsiya) qazib olingan. Konning resurs bazasi 4 ming tonnadan ortiq (150 million unsiya).
O‘zbekistonda qancha oltin bor?
Mamlakatda oltinga oid ma’lumotlar sekin-asta ochiqlanmoqda. Mart oyida Markaziy bank 2010-yildan 2020-yilga qadar oltin savdosi statistikasini e’lon qilgandi. O‘shanda O‘zbekiston so‘nggi yillarda qimmatbaho metall eksportini keskin oshirgani aniqlangan.
Davlat statistika qo‘mitasi muntazam ravishda oltin sotishdan mamlakat qancha daromad olayotgani haqida ma’lumot berib kelmoqda, lekin zaxiralar va ishlab chiqarish haqidagi ma’lumotlar hali ham tashqi hisob-kitoblarga asoslangan.
Avvalroq O‘zbekiston oltin qazib oluvchi top-10 mamlakatlar ro‘yxatiga kiritilgan edi. O‘shanda Oltin bo‘yicha butunjahon kengashi ma’lumotlari manba bo‘lib xizmat qilgan. Unga ko‘ra, 2020-yilda mamlakat birinchi bor 100 tonnadan ortiq oltin qazib olgan. Bu unga reytingning 8-pog‘onasida joylashgan Peru o‘rnini egallashga imkon bergan.
Amerikaning Forbes nashri o‘shanda mamlakatda dunyodagi eng yirik ochiq oltin koni — “Muruntov” joylashganini ta’kidlagan edi.
Mavzuga doir: O‘zbekiston oltin eksportini yana to‘xtatdi
Izoh (0)