4-sentabr kuni O‘zbekiston tashqi ishlar vaziri Abdulaziz Komilov Italiya tashqi ishlar va xalqaro hamkorlik vaziri Luiji Di Mayo bilan uchrashuv o‘tkazdi, deb xabar beradi tashqi idora matbuot xizmati.
Muzokaralarda siyosiy-diplomatik, savdo-iqtisodiy, ta’lim, turizm va boshqa sohalardagi O‘zbekiston—Italiya hamkorligining dolzarb jihatlari muhokama qilingan.
Tomonlar turli darajalarda bo‘lib o‘tajak tadbirlar jadvali, shu jumladan, Toshkent shahrida o‘tkazilishi rejalashtirilgan tashqi siyosat mahkamalari rahbarlari darajasida “Italiya—Markaziy Osiyo” ikkinchi vazirlar uchrashuvi yuzasidan fikr almashgan.
Mintaqaviy xavfsizlik masalalari, xususan, Afg‘onistondagi vaziyat ko‘rib chiqilgan. Italiya tomoni Yevropa mamlakatlari va boshqa davlatlar fuqarolarini evakuatsiya qilish jarayonini tashkil etishda ko‘rsatilgan salmoqli yordam uchun O‘zbekistonga minnatdorlik bildirgan.
“Tomonlar Afg‘oniston yo‘nalishidagi aloqalarni, shu jumladan, mintaqaviy xavfsizlik va barqarorlikni ta’minlash, shuningdek, Afg‘onistonga insonparvarlik yuklarini yetkazib berishda hamkorlikni davom ettirishga tayyor ekanliklarini ma’lum qildilar”, — deyiladi xabarda.
Avvalroq Abdulaziz Komilov Toshkentda Germaniya tashqi ishlar vaziri bilan uchrashuv o‘tkazgani, Yaponiya tashqi ishlar vazirining parlamentar o‘rinbosari Satoshi Nakanishini qabul qilgani to‘g‘risida xabar berilgandi.
Izoh (0)