1 сентябрь куни Шавкат Мирзиёевнинг Туркия президенти Ражаб Тоййиб Эрдўғон билан телефон орқали мулоқоти бўлиб ўтди, деб хабар бермоқда Президент матбуот хизмати.
Қайд этилишича, суҳбат аввалида Туркия раҳбари Президент ва Ўзбекистоннинг кўп миллатли халқини мамлакат мустақиллигининг 30 йиллиги билан самимий қутлади. Туркия халқи номидан Ўзбекистонга тинчлик-осойишталик, фаровонлик ва равнақ тилакларини изҳор этди.
Суҳбат давомида президентлар икки томонлама ҳамкорлик юзасидан фикр алмашди. 2021 йил бошидан ўзаро савдо кўрсаткичлари икки баробар ўсгани ва 240 дан ортиқ қўшма корхона ташкил этилгани қайд этилди.
Мамлакатлар етакчи компанияларининг кооперацияси кучайиб бормоқда, жумладан, энергетика, саноат, қишлоқ хўжалиги, инфратузилма, туризм ва бошқа соҳаларда муҳим инвестиция лойиҳалари амалга оширилмоқда. Қўшма таълим ва маданий-гуманитар дастурлар муваффақиятли жорий қилинмоқда. Хусусан, шу йилнинг август ойида туркиялик етакчи мутахассислар Тошкент ва Самарқанд шаҳарларидаги архитектура-қурилиш институтларига раҳбар бўлди.
Етакчилар бўлажак олий даражадаги тадбирлар режасини, шу жумладан, Стратегик ҳамкорлик кенгашининг навбатдаги йиғилишига тайёргарлик масалаларини ҳам кўриб чиқди.
Афғонистондаги ҳарбий-сиёсий аҳвол кескинлашиши таъсирида минтақадаги вазият ривожланишига алоҳида эътибор қаратилди. Минтақавий хавфсизлик ва барқарорликни таъминлаш масалалари юзасидан алоқалар ва кўп томонлама мулоқотни давом эттириш муҳим экани таъкидланди.
Бундан аввал Дубай амири Шавкат Мирзиёевни Ўзбекистон мустақиллигининг 30 йиллиги билан табриклагани ҳақида хабар берилган эди. «Толибон» ҳаракати ҳам Ўзбекистон халқи ва раҳбариятини Мустақиллик байрами билан қутлаб, табрик мактуби йўллади.
Изоҳ (0)