“Uddalab bo‘lmas topshiriq-7” filmini suratga olish ishlari vaqtida noma’lum shaxslar Tom Kruzning tansoqchisiga tegishli BMW X7 avtomobilini minib qochdi. Mashina ichida aktyorning bir necha ming funtlik yuklari bo‘lgan, deb xabar beradi Esquire.
Jinoyatchilar Birmingemdagi mehmonxona yaqinida turgan lyuks sinfiga kiruvchi avtomobilni kalitsiz o‘t oldirish uchun skaner yordamida signaldan nusxa ko‘chirgan. “Uddalab bo‘lmas topshiriq” agentlari ham foydalanishi mumkin bo‘lgan bu kabi usul o‘g‘rilarga mashinani kinoaktyorning qo‘riqchilari “tumshug‘i ostidan” olib qochish imkonini bergan. Avtomobil qiymati 100 ming funtga baholanmoqda.
O‘g‘rilar tanlangan avtomobil signalni kalitsiz brelokka uzatishini ta’minlab, uni tutib qoladi. Mashina yonida turgan jinoyatchi signalni ushlab olib, mashinani aldaydi. Jinoyatchi salonga kirishi bilan jarayon yana takrorlanib, dvigatel o‘t oldiriladi. Shundan so‘ng bo‘sh brelok avtomobilning kompyuter porti orqali qayta dasturlanadi.
O‘g‘rilar, shuningdek, radiochastotani uzatish orqali haydovchining brelokini bloklab qo‘ygan bo‘lishi mumkin — shu orqali avtomobil eshigi yopilmagan holda qoladi, bu esa uning kompyuter qurilmalariga kirish imkonini beradi.
Kruzning Birmingemdagi xavfsizligini ta’minlashga mas’ul tansoqchi 25-avgust kuni ertalab mashinani qo‘ygan joyidan topa olmagan. Mehmonxona mashinani himoyalangan avtoturargohga joylashtirishni maslahat bergan, ammo Kruzning haydovchisi avtomobilni mehmonxona oldiga qo‘yishga qaror qilgan. Kuzatuv qurilmalari bilan jizohlangan mashina oradan biroz vaqt o‘tgandan so‘ng topilgan, ammo undagi barcha narsa o‘g‘irlab ketilgan.
BMW kompaniyasi aktyorga bir necha soat ichida xuddi shu kabi mashinani taqdim etgan. Ta’kidlanishicha, Tom Kruzning sodir bo‘lgan voqeadan qattiq jahli chiqqan.
Avvalroq Tom Kruz “Uddalab bo‘lmas topshiriq-7” filmining suratga olish jarayonida avariyaga uchragani ma’lum bo‘lgandi.
Izoh (0)