«Уддалаб бўлмас топшириқ-7» фильмини суратга олиш ишлари вақтида номаълум шахслар Том Крузнинг тансоқчисига тегишли BMW Х7 автомобилини миниб қочди. Машина ичида актёрнинг бир неча минг фунтлик юклари бўлган, деб хабар беради Esquire.
Жиноятчилар Бирмингемдаги меҳмонхона яқинида турган люкс синфига кирувчи автомобилни калитсиз ўт олдириш учун сканер ёрдамида сигналдан нусха кўчирган. «Уддалаб бўлмас топшириқ» агентлари ҳам фойдаланиши мумкин бўлган бу каби усул ўғриларга машинани киноактёрнинг қўриқчилари «тумшуғи остидан» олиб қочиш имконини берган. Автомобиль қиймати 100 минг фунтга баҳоланмоқда.
Ўғрилар танланган автомобиль сигнални калитсиз брелокка узатишини таъминлаб, уни тутиб қолади. Машина ёнида турган жиноятчи сигнални ушлаб олиб, машинани алдайди. Жиноятчи салонга кириши билан жараён яна такрорланиб, двигатель ўт олдирилади. Шундан сўнг бўш брелок автомобилнинг компьютер порти орқали қайта дастурланади.
Ўғрилар, шунингдек, радиочастотани узатиш орқали ҳайдовчининг брелокини блоклаб қўйган бўлиши мумкин — шу орқали автомобиль эшиги ёпилмаган ҳолда қолади, бу эса унинг компьютер қурилмаларига кириш имконини беради.
Крузнинг Бирмингемдаги хавфсизлигини таъминлашга масъул тансоқчи 25 август куни эрталаб машинани қўйган жойидан топа олмаган. Меҳмонхона машинани ҳимояланган автотураргоҳга жойлаштиришни маслаҳат берган, аммо Крузнинг ҳайдовчиси автомобилни меҳмонхона олдига қўйишга қарор қилган. Кузатув қурилмалари билан жизоҳланган машина орадан бироз вақт ўтгандан сўнг топилган, аммо ундаги барча нарса ўғирлаб кетилган.
BMW компанияси актёрга бир неча соат ичида худди шу каби машинани тақдим этган. Таъкидланишича, Том Крузнинг содир бўлган воқеадан қаттиқ жаҳли чиққан.
Аввалроқ Том Круз «Уддалаб бўлмас топшириқ-7» фильмининг суратга олиш жараёнида аварияга учрагани маълум бўлганди.
Изоҳ (0)