Janubiy Koreyada Tesla Model 3 elektrokari yangi avtomobillarni baholashning KNCAP usuli bo‘yicha xavfizlikka tekshirildi. Elektrokar krash-test vaqtida vazifani a’loga uddalab, beshta yulduzni qo‘lga kiritgan, ammo yordamchi tizimlar sinovida vaziyat o‘zgargan: yo‘lda to‘satdan paydo bo‘lgan to‘siq vaqtida favqulodda tormozlanish tizimi bir necha bor ishlamay qolgan va Model 3 velosipedchi vazifasini bajargan manekenni urib yuborgan. Natijada modelga qo‘yilgan baho to‘rt yulduzga tushib ketgan, deb xabar beradi Motor.
Krash-testlar seriyasi yakuniga ko‘ra, Tesla Model 3 maksimal besh yulduzga mos keladigan 83,3 ballni qo‘lga kiritgan. Shu bilan birga, velosiped haydovchilar va piyodalar xavfsizligi uch yulduzga baholangan bo‘lib, bu past natija hisoblanadi.
Bunga elektrokar soatiga 20, 25 va 40 kilometr tezlikda o‘tkazilgan sinovlarda bir necha bor velosipedchini urib yuborgani sabab bo‘lgan. Bu kabi vaziyat yo‘lda sodir bo‘lganida katta ehtimol bilan jiddiy jarohat olinmagan bo‘lardi, biroq tizim yo‘ldagi obyektni nima sababdan tanimagani va favqulodda tormozlanishni ishga tushirmagani noma’lum.
Bu Tesla Model 3 bilan o‘tkazilgan birinchi krash-test emas. Masalan, 2019-yilda elektrokar Amerika Yo‘llardagi xavfsizlik sug‘urtasi instituti (IIHS) uslubi bo‘yicha sinovlardan o‘tkazilgan: model barcha test yakunlari bo‘yicha eng yuqori ballarni to‘plab, Top Safety Pick+ reytingi yetakchisiga aylangan tarixdagi ikkinchi elektromobilga (Audi e-tron’dan keyingi) aylangan.
Avvalroq xitoyliklar Tesla elektrokarlarining tepkilarini videoga olish uchun kamera o‘rnatishni boshlagani, bunga so‘nggi vaqtda YTHlar ortgani sabab bo‘layotgani to‘g‘risida xabar berilgandi.
Izoh (0)