The Korean Carblog nashri yangi Hyundai Casper modeliga o‘rnatiladigan dvigatellarga oid ma’lumotlar bilan bo‘lishdi. Marka lineykasidagi eng ixcham krossover rivojlanayotgan davlatlar bozori uchun mo‘ljallangan bo‘lib, ikkita modifikatsiyaga ega bo‘ladi: 76 ot kuchini taqdim etishga qodir 1,0 litrli “atmosfera” va 100 ot kuchili turbomotor. Mish-mishlarga ko‘ra, yangi model agregati besh pog‘onali mexanik uzatmalar qutisi yordamida boshqariladi, deb xabar beradi Motor.
Janubiy Koreya OAVlari ma’lumotlariga ko‘ra, Casper sertifikat sinovlarining yakuniy bosqichida turibdi. Yangi model Hyundai’ning Santor xetchbeki va Aura sedani ishlab chiqarilgan K1 platformasida yaratilgan. Krossover uzunligi to‘rt metrdan oshmaydi va uch eshikli Lada Niva Legend’dan ham ixchamroq bo‘ladi. Modelning o‘ziga xosligi — orqa o‘rindig‘iga SUV standarti bo‘yicha uch kishi emas, ikki kishi sig‘ishida.
Avvalroq tarqalgan josuslik suratlarida Casper eksteryerining dizaynini ko‘rish mumkin edi. Model yumaloq farali ikki qavatga ega noodatiy optikaga hamda ko‘plab uchburchaklardan tashkil topgan tasvirli orqa fonarlarga ega bo‘lgan. Mashina saloniga virtual qurilmalar paneli va axborot-ko‘ngilochar tizim uchun katta ekran o‘rnatiladi.
Yo‘ltanlamas Janubiy Koreyadagi Kvanju shahridagi Hyundai Motor Company korxonasida ishlab chiqariladi. Marka yiliga 70 ming nusxa Casper’ni taqdim etishni rejalashtirgan.
Taxminlarga ko‘ra, ushbu model Hyundai’ning eng kichkina va eng arzon krossoveriga aylanadi.
Avvalroq Hyundai 2025-yilga borib aeroportlarda uchar taksilar xizmatini ishga tushirishni rejalashtirayotgani to‘g‘risida xabar berilgandi.
Izoh (0)