Janubiy Avstraliya politsiyasi tezlikni me’yorini qariyb ikki barobar oshirgan birinchi avlod Subaru Impreza WRX’ni to‘xtatdi. Oq sedanni boshqarib ketayotgan 80 yoshli nafaqaxo‘r olti oyga haydovchilik guvohnomasidan mahrum qilinib, 1814 Avstraliya dollari (1300 AQSh dollar) miqdorida jarimaga tortilgan, deb xabar beradi Motor.
Oq Subaru Impreza WRX politsiya radariga Janubiy Avstraliya poytaxti yaqinidagi ikki polosali cho‘l yo‘lida tushib qolgan. Sedan soatiga 182 kilometr tezlikda harakatlanayotgan bo‘lgan va patrul ekipaji tomonidan to‘xtatilgan. Mashinani boshqarib ketayotgan 80 yoshli erkak politsiyachilarga hech qanday e’tiroz bildirmasdan, shunchaki Alma shaharchasiga ishlari ko‘pligi uchun shoshayotgani va maksimal tezlik soatiga 100 kilometr etib cheklanganiga e’tibor bermaganini aytgan.
Shunga qaramay, qo‘llanilgan jazo juda qattiq bo‘lgan va uning yoshi ham inobatga olinmagan: endilikda u haydovchilik guvohnomasidan 6 oyga mahrum etilgan va katta miqdorda jarima to‘lashi kerak.
ABC News’ning ma’lum qilishicha, Janubiy Avstraliya politsiyasi tezlikni ikki barobarga oshirish holatini “jiddiy xavotir uyg‘otadi” deb atagan, ayniqsa, shtatda o‘lim bilan bog‘liq avariyalar soni ortayotgan bir paytda. 2021-yilning o‘zida Janubiy Avstraliyada sodir bo‘lgan YTHlar oqibatida 64 kishi halok bo‘lgan — bu o‘tgan yilga nisbatan 12 foizga ko‘p demak.
Avvalroq AQShda 87 yoshli nafaqaxo‘r 500 ot kuchiga ega Chevrolet Corvette’ni xarid qilib, unda do‘konga qatnayotgani, Floridada 90 yoshli nafaqaxo‘r tug‘ilgan kunida yangi Chevrolet Corvette sotib olgani to‘g‘risida xabar berilgandi.
Izoh (0)