Niderlandiyaning Groningen shahrida yangi Volkswagen ID.3 elektrokari bilan ko‘ngilsiz hodisa sodir bo‘ldi — quvvatlantirgichga ulangan mashina avtoturargohda yonib ketgan. Quvvatlantirgichni sug‘urgan mashina egasi qalin tutunga duch kelgan. Alanga mashinani egallab olishidan oldin ayol farzandi bilan xavfsiz joyga qochishga ulgurgan. ID.3 butkul yonish bilan birga, orqasida turgan Nissan Leaf’ga ham shikast yetkazgan, deb xabar beradi Motor.
Volkswagen kompaniyasi vaziyatga munosabat bildirib, holat bo‘yicha o‘zlarining tergovini o‘tkazishga va’da bergan. Avtomobil ishlab chiqaruvchi elektrokar qoldiqlarini o‘rganib, sodir bo‘lgan voqea sabablarini aniqlash niyatida. Bu nemis markasining elektromobili bilan bog‘liq birinchi bor qayd etilgan avariya: ID.3 yoki ID.4 elektrokarlarning yonib ketishi oid xabarlar OAVlarda e’lon qilinmagan.
Versiyalardan biriga ko‘ra, olov batareyaning qizib ketishi oqibatida yuzaga kelgan bo‘lishi mumkin. Bu kabi taxmin Tesla elektrokarlari bilan sodir bo‘ladigan shu kabi vaziyatlarda tez-tez tilga olinadi.
Avvalroq eng kuchli Tesla Model S harakat vaqtida yonib ketgani, AQShda avtopilot rejimida harakatlangan Tesla halokatga uchragani, Xitoyda Tesla ishtirokida yana bir YTH sodir bo‘lgani to‘g‘risida xabar berilgandi.
Izoh (0)