O‘zbekistondan noqonuniy ravishda olib chiqib ketilgan madaniy boyliklar Islom sivilizatsiyasi markaziga topshirildi

25-avgust kuni Xalqaro islom akademiyasida Rossiyadan O‘zbekistonga qaytarilgan noyob tarixiy-madaniy boyliklarni Islom sivilizatsiyasi markazi fondiga rasman topshirish marosimi bo‘lib o‘tdi. Bu haqda Turizm va sport vazirligi “Daryo”ga ma’lum qildi.

Marosimda Prezident maslahatchisi, O‘zbekistondagi Islom sivilizatsiyasi markazi direktori Shoazim Minovarov, bosh vazir o‘rinbosari – turizm va sport vaziri Aziz Abduhakimov so‘zga chiqib, Rossiya tomonidan O‘zbekistonga qaytarilgan XIII–XIX asrlarga oid qimmatbaho madaniy boyliklarning O‘zbekistondagi Islom sivilizatsiyasi markazi fondiga topshirilishining ahamiyati, madaniy meros boyliklarini asrab-avaylash va uni kelajak avlodga yetkazish mexanizmlarini ishlab chiqish zarurligini, mas’uliyatini alohida ta’kidlagan.

Ma’lum qilinishicha, O‘zbekiston uchun madaniy ahamiyatga ega bo‘lgan 29 ta qo‘lyozma va 16 ta sopol buyum 2016-yilda qonunbuzar tomonidan mamlakatdan yashirincha olib ketilgan. Mazkur ashyolardan 9 dona qo‘lyozma va kitoblar arab, fors-turk tillarida yozilgan diniy matnlar va she’riy asarlar bo‘lib, ular taxminan 1644—1880-yillar davrida yaratilgan, 16 dona sopol buyumdan 3 tasi esa O‘rta asrlar va Yangi davrdagi ( XV-XVII asrlar) Samarqand kulolchilik maktabiga mansub.

Davlat bojxona qo‘mitasi raisi o‘rinbosari O‘tkir Qodirovning ta’kidlashicha, so‘nggi 5 yil davomida respublika bojxona organlari tomonidan 450 ga yaqin qo‘lyozma asar, noyob tanga va boshqa osori-atiqalar ushlab qolingan.

Ma’lumot uchun, “Madaniy boyliklarning olib chiqilishi va olib kirilishi to‘g‘risida”gi qonunning 5-moddasiga asosan madaniy boyliklarning olib chiqilishi va olib kirilishini davlat tomonidan tartibga solish O‘zbekiston Madaniyat vazirligi va Davlat bojxona qo‘mitasi tomonidan amalga oshiriladi.

Avvalroq Toshkentda Nikolay II davriga tegishli tangalarning olib chiqib ketilishining oldi olingani, Toshkentda qiymati 16,8 mlrd so‘mdan ortiq bo‘lgan olmos, zumrad va Kushon davlatida zarb qilingan tilla tangani sotayotgan shaxslar ushlangani to‘g‘risida xabar berilgandi.