25 август куни Халқаро ислом академиясида Россиядан Ўзбекистонга қайтарилган ноёб тарихий-маданий бойликларни Ислом цивилизацияси маркази фондига расман топшириш маросими бўлиб ўтди. Бу ҳақда Туризм ва спорт вазирлиги «Дарё»га маълум қилди.
Маросимда Президент маслаҳатчиси, Ўзбекистондаги Ислом цивилизацияси маркази директори Шоазим Миноваров, бош вазир ўринбосари – туризм ва спорт вазири Азиз Абдуҳакимов сўзга чиқиб, Россия томонидан Ўзбекистонга қайтарилган XIII–XIX асрларга оид қимматбаҳо маданий бойликларнинг Ўзбекистондаги Ислом цивилизацияси маркази фондига топширилишининг аҳамияти, маданий мерос бойликларини асраб-авайлаш ва уни келажак авлодга етказиш механизмларини ишлаб чиқиш зарурлигини, масъулиятини алоҳида таъкидлаган.
Маълум қилинишича, Ўзбекистон учун маданий аҳамиятга эга бўлган 29 та қўлёзма ва 16 та сопол буюм 2016 йилда қонунбузар томонидан мамлакатдан яширинча олиб кетилган. Мазкур ашёлардан 9 дона қўлёзма ва китоблар араб, форс-турк тилларида ёзилган диний матнлар ва шеърий асарлар бўлиб, улар тахминан 1644—1880 йиллар даврида яратилган, 16 дона сопол буюмдан 3 таси эса Ўрта асрлар ва Янги даврдаги ( XV-XVII асрлар) Самарқанд кулолчилик мактабига мансуб.
Давлат божхона қўмитаси раиси ўринбосари Ўткир Қодировнинг таъкидлашича, сўнгги 5 йил давомида республика божхона органлари томонидан 450 га яқин қўлёзма асар, ноёб танга ва бошқа осори-атиқалар ушлаб қолинган.
Маълумот учун, «Маданий бойликларнинг олиб чиқилиши ва олиб кирилиши тўғрисида»ги қонуннинг 5-моддасига асосан маданий бойликларнинг олиб чиқилиши ва олиб кирилишини давлат томонидан тартибга солиш Ўзбекистон Маданият вазирлиги ва Давлат божхона қўмитаси томонидан амалга оширилади.
Аввалроқ Тошкентда Николай II даврига тегишли тангаларнинг олиб чиқиб кетилишининг олди олингани, Тошкентда қиймати 16,8 млрд сўмдан ортиқ бўлган олмос, зумрад ва Кушон давлатида зарб қилинган тилла тангани сотаётган шахслар ушлангани тўғрисида хабар берилганди.
Изоҳ (0)