Buxoro amirlaridan biri Sayid Abdulahadxonning Navoiy viloyati Karmana tumanida joylashgan yozgi qarorgohi xaroba holga kelib qolgani haqida xabar tarqaldi. Navoiy viloyati Turizm va sport bosh boshqarmasi restavratsiya uchun budjetdan 3,1 milliard so‘m ajratilganini ma’lum qildi.
Karmanadagi “Mirzachorbog‘” qarorgohi xarob holdaligi aks etgan suratlar ijtimoiy tarmoqlarda e’lon qilindi va tarmoq foydalanuvchilari keskin tanqidlariga sabab bo‘ldi. Unda Buxoro amiri Abdulahadxon tomonidan 1900—1905-yillarda barpo etilgan ushbu madaniy meros obyekti ta’mirtalab ahvolga kelib qolgani aks etgan suratlar keltirilgan.
Navoiy viloyati Turizm va sport bosh boshqarmasi xabarida aytilishicha, Karmana tumani “Ko‘hna Qo‘rg‘on” MFY hududida joylashgan, XIX asrda bunyod etilgan “Mirzachorbog‘” xonqarorgohi O‘zbekiston madaniy meros obyektlarini ta’mirlash ishlari 2021-yil dasturiga kiritilgan bo‘lib, loyiha-smeta hujjatlari tayyorlangan va ushbu dastur bo‘yicha tayyorlangan loyiha-smeta hujjatlari Ilmiy ekspert kengashidan o‘tkazilib, davlat budjetidan 3,1 milliard so‘m mablag‘ ajratilgan hamda yaqin kunlarda tender savdolari amalga oshiriladi.
Shu o‘rinda davlat mulki hisoblanadigan madaniy meros obyektlarini ta’mirlash, restavratsiya qilish ishlari Vazirlar Mahkamasining 2019-yil 20-dekabrdagi “Moddiy madaniy merosning ko‘chmas mulk obyektlarini asrashga doir faoliyatni litsenziyalash to‘g‘risidagi nizomni tasdiqlash haqida’gi 1021-sonli qaror asosida madaniy meros obyektlarini ta’mirlash ishlariga ruxsat beruvchi litsenziyaga ega bo‘lgan tashkilotlar tomonidan amalga oshirilish mumkinligi ma’lumot sifatida keltirib o‘tilgan.
Sayid Abdulahadxonning yozgi qarorgohi xaroba holga kelib qolgani haqida 2020-yilda ham aytilgandi. O‘shanda Madaniyat vazirligi obyektni 2021—2022-yillarda to‘liq restavratsiya qilish rejalashtirilganini ma’lum qilgandi.
Bundan avval Buxoroda XVI asrda qurilgan “Abdullaxon” madrasasi devorining bir qismi 30-iyul kechasi o‘pirilib tushgani to‘g‘risida xabar berilgandi. Madaniy meros obyekti hisoblangan “Abdullaxon” madrasasi devorining bir qismi qulab tushgani holati viloyat prokuraturasi tomonidan o‘rganilib, o‘rganish natijasida Jinoyat kodeksining 207-moddasi (mansabga sovuqqonlik bilan qarash) bilan jinoyat ishi qo‘zg‘atilgandi. Dastlabki hisob-kitoblarga ko‘ra, obidani to‘liq ta’mirlash va tiklash ishlari uchun, taxminan, 6 milliard so‘m talab etiladi.
Izoh (0)