Toshkent va Andijon viloyatlarining ayrim hududlarida 25-avgust kuni quyun kuzatildi. Voqea guvohlari manzarani videoga olib, ijtimoiy tarmoqlarga joyladi.
Gidrometeorologik ilmiy tahlillar, ob-havo prognozlari, tadqiqotlar, ma’ruzalar kanalining yozishicha, shu kuni mahalliy vaqt bilan soat 15:00 va 16:30 orasida vodiy hamda Toshkent viloyati shimoli-sharqiy hududlarida bosim tafovutlari orasidagi farqlar kattalashgan. Shunining uchun joylarda katta ehtimol bilan kichik shamol uyirmalari, boshqacha aytganda, quyun hodisalari kuzatilayotgan bo‘lishi mumkin.
Quyun hodisalari uzoq muddatli yog‘ingarchiliksiz yoz kunlarida tez-tez kuzatiladi va O‘zbekistonda xavfli emas.
Bundan avval shunday hodisa 16-avgustda Sirdaryo viloyatida kuzatilgandi va ijtimoiy tarmoqda tornado nomi bilan tilga olingandi. Ushbu holatga izoh bergan “O‘zgidromet” tornadolar o‘ta halokatli tabiat hodisasi ekanligi, asosan, tropik va subtropiklardagi okean va quruqlik o‘rtasida yuzaga kelishini ta’kidlab, Sirdaryo viloyatida kuzatilgan hodisaning dahshatli tornado tabiat hodisasiga aloqasi yo‘qligini bildirgandi.
“Umuman olganda, O‘zbekistonda tornado hodisasi muqaddam kuzatilmagan. Girdob (smerch)lar yoz oylarida respublikaning turli hududlarida tez-tez kuzatiladi”, — deya izoh bergandi Respublika Gidrometeorologiya markazi.
Izoh (0)