Oliy sud raisi o‘rinbosari Ikrom Muslimov raisligida 2021-yil 25-avgust kuni o‘tkazilgan ochiq sud majlislarida mustabid sovet tuzumi davrida qatag‘on qurboni bo‘lgan va hozirgi kunga qadar oqlanmagan yuzlab shaxslar oqlandi. Bu haqda “Daryo” muxbiri xabar bermoqda.
Ta’kidlanishicha, O‘zbekiston Prezidentining 2020-yil 8-oktabrdagi “Qatag‘on qurbonlarining merosini yanada chuqur o‘rganish va ular xotirasini abadiylashtirishga doir qo‘shimcha chora-tadbirlar to‘g‘risida”gi farmoyishiga binoan, respublika ishchi guruhi tuzilgan va qatag‘on qurbonlarining nomlarini tiklash hamda xotirasini abadiylashtirish bo‘yicha “yo‘l xaritasi” tasdiqlangan.
Qatag‘on qurbonlari xotirasi davlat muzeyi direktori, respublika ishchi guruhi a’zosi B.Hasanov tomonidan qatag‘on qurboni bo‘lgan va hozirgacha oqlanmagan shaxslarning ro‘yxati taqdim etilgan.
Mazkur shaxslarning yetti nafariga nisbatan jinoyat ishlari DXXning arxivida saqlanayotganligi aniqlanib, jinoyat ishlari chaqirtirilgan.
Oliy sudga 2021-yilning 24-fevralida 115 nafar shaxsga nisbatan 6 ta jinoyat ishi kelib tushgan bo‘lib, ishchi guruh tomonidan o‘rganib chiqilgan. Ushbu jinoyat ishlarida sud majlisi bayonnomasi yoki sud hujjatlari (hukm yoki boshqacha qaror) mavjud emasligi, ishlarda faqatgina OGPUning uchlik majlisi bayonnomasidan ko‘chirma borligi aniqlangan.
Bosh prokuror o‘rinbosari tomonidan ushbu jinoyat ishlari yuzasidan tegishli tartibda Oliy sudning Jinoyat ishlari bo‘yicha sudlov hay’atiga protestlar keltirilgan.
Mazkur jinoyat ishlari Oliy sud raisi o‘rinbosari Ikrom Muslimov raisligida o‘tkazilgan ochiq sud majlislarida ko‘rib chiqilib, keltirilgan protestlar qanoatlantirildi va JPKning 83-moddasiga asosan jami 6 ta jinoyat ishi bo‘yicha 115 nafar shaxs oqlandi.
Ular orasida Akmal Ikromov, Rustam Islomov, Akbar Islomov, Sulaymon Azimov, Muhammadjon Yo‘ldoshev, K.Boltayev, M.Hasanov, Manjara va boshqalarning nomi qayd etilgan.
Izoh (0)