Тошкент ва Андижон вилоятларининг айрим ҳудудларида 25 август куни қуюн кузатилди. Воқеа гувоҳлари манзарани видеога олиб, ижтимоий тармоқларга жойлади.
Гидрометеорологик илмий таҳлиллар, об-ҳаво прогнозлари, тадқиқотлар, маърузалар каналининг ёзишича, шу куни маҳаллий вақт билан соат 15:00 ва 16:30 орасида водий ҳамда Тошкент вилояти шимоли-шарқий ҳудудларида босим тафовутлари орасидаги фарқлар катталашган. Шунининг учун жойларда катта эҳтимол билан кичик шамол уйирмалари, бошқача айтганда, қуюн ҳодисалари кузатилаётган бўлиши мумкин.
Қуюн ҳодисалари узоқ муддатли ёғингарчиликсиз ёз кунларида тез-тез кузатилади ва Ўзбекистонда хавфли эмас.
Бундан аввал шундай ҳодиса 16 августда Сирдарё вилоятида кузатилганди ва ижтимоий тармоқда торнадо номи билан тилга олинганди. Ушбу ҳолатга изоҳ берган «Ўзгидромет» торнадолар ўта ҳалокатли табиат ҳодисаси эканлиги, асосан, тропик ва субтропиклардаги океан ва қуруқлик ўртасида юзага келишини таъкидлаб, Сирдарё вилоятида кузатилган ҳодисанинг даҳшатли торнадо табиат ҳодисасига алоқаси йўқлигини билдирганди.
«Умуман олганда, Ўзбекистонда торнадо ҳодисаси муқаддам кузатилмаган. Гирдоб (смерч)лар ёз ойларида республиканинг турли ҳудудларида тез-тез кузатилади», — дея изоҳ берганди Республика Гидрометеорология маркази.
Изоҳ (0)