Afg‘onistonda ham saylov uchastkalari tashkil etiladi – Tashqi ishlar vazirligi

O‘zbekistonda prezident saylovlari arafasida Afg‘onistonda ham saylov uchastkalari ochilishi rejalashtirilgan. Bu haqda tashqi ishlar vazirining birinchi o‘rinbosari Farhod Arziyev 25-avgust kuni bo‘lib o‘tgan matbuot anjumanida ma’lum qildi, deb xabar beradi “Gazeta.uz”.

“Darhaqiqat, qo‘shni mamlakatda vaziyat murakkabligicha qolmoqda. Ammo men ommaviy axborot vositalariga aytmoqchimanki, bizning diplomatik vakolatxonalarimiz – Kobuldagi elchixona va Mozori Sharifdagi konsullik o‘z faoliyatini davom ettirmoqda. Shunga asoslanib, bu vakolatxonalarda tegishli saylov uchastkalarini bo‘lishi ko‘zda tutilgan”, – dedi Farhod Arziyev.

Ma’lumot uchun, O‘zbekistonning diplomatik vakolatxonalari mavjud bo‘lgan 38 ta davlatda 54 ta (55 ta dipvakolatxona, O‘zbekistonning Nyu-Yorkdagi bosh konsulxonasi va BMTdagi vakolatxonasida birgalikdagi) statsionar saylov uchastkasi tashkil etiladi. Qolaversa, ushbu davlatlarning 128 ta shahrida va diplomatik vakolatxonalar mavjud bo‘lmagan 11 davlatda qo‘shimcha ravishda jami 316 ta ko‘chma saylov punkti tayyorlanishi reja qilingan.