Rossiyada 1992-yilda ishlab chiqarilgan va hozirga qadar 255 kilometr yo‘l bosgan oq “ZAZ-968M” 1,2 million rubl (16,1 ming dollar) qiymatida sotuvga qo‘yildi, deb xabar beradi Motor.
“ZAZ-968M” modeli konveyerdan 1979-yilda chiqqan. Mashhur “Zaporojets”ning so‘nggi yangilanishiga aylangan model modifikatsiyasidan kelib chiqib, 41-45 ot kuchini taqdim etishga qodir 1,2 litrli motor bilan jihozlangan. Sotuvga qo‘yilgan mashina o‘zidan oldingi “ZAZ-968A” versiyadan to‘g‘ri burchakli orqa faralari va burilish chiroqlari, shuningdek, keng sig‘imli yukxonasi bilan ajralib turadi.
Sotuvga qo‘yilgan nusxa ideal holatda. Sotuvchining so‘zlariga ko‘ra, mashinaning barcha texnik uzellari soz holatda. 30 yil davomida “Zaporojets” 255 kilometr yo‘l bosgan. Qolgan vaqt esa sotuvchining bobosining garajida harakatsiz saqlangan.
Mashina egasi ushbu “Zaporojets”ni 1,2 million rublga sotishga tayyor. Bu pulga Rossiyada bazaviy jamlanmadagi yangi Hyundai Creta’ni xarid qilish mumkin.
Avvalroq Polshada 34 yillik “Zaporojets” yangi Tracker narxida sotuvga qo‘yilgani, internetda mashhur “Zaporojets”ning futuristik dizaynga ega zamonaviy tasvirlari paydo bo‘lgani to‘g‘risida xabar berilgandi.
Mavzuga doir:
Izoh (0)