Surxondaryo viloyati Denov tumanida joylashgan bozorlarning birida sotuvchiga nisbatan kuch ishlatgan fuqaroga jinoyat ishi qo‘zg‘atildi, deb xabar beradi viloyati IIB axborot xizmati.
Ma’lum qilinishicha, 28-iyul kuni soat 11:00 da tumanning “Lolazor” mahallasida joylashgan “Xalqobod” buyum bozori hududida X.Safarali ismli fuqaro jamoat joylarida yurish-turish qoidalariga amal qilmay, janjal ko‘targan. U bozorda savdo qilayotgan S.Gulchehra bilan yuzaga kelgan o‘zaro tortishuv oqibatida uni urgan. Ularni ajratish uchun kelgan sotuvchining akasi — S.Bahodirni ham yuziga va duch kelgan joylariga urib, yengil tan jarohati yetkazgan.
Oqibatda 11-avgust kuni X.Safaraliga nisbatan Jinoyat kodeksining 277-moddasi (bezorilik) 3-qismi “g” bandi bilan jinoyat ishi qo‘zg‘atilgan.
Avvalroq Toshkentda imkoniyati cheklangan qizni kaltaklagan 27 yoshli yigit tergovdan yashiringani uchun qidiruvga berilgani, Samarqandda bir guruh shaxslarni sababsiz urib, IIB xodimlariga qarshilik ko‘rsatgan 8 kishi qamoqqa olingani, Qashqadaryoda ikki mast fuqaro uch kishi bilan janjallashib, ularni jarohatlagani to‘g‘risida xabar berilgandi.
Izoh (0)