Navoiy shahrida mast uka akasini o‘ldirib qo‘ydi. Bu haqda “Yangi Davr” informatsion dasturida ma’lum qilindi.
Ma’lum bo‘lishicha, samarqandlik aka-uka Navoiy shahridagi qurilishda ishlayotgan bo‘lgan. Ular orasida 12 million so‘m pul sabab kelishmovchilik kelib chiqqan. Jahl ustida uka ketmon bilan akasining bosh qismiga urishi oqibatida jabrlanuvchi ko‘rsatilgan tibbiy muolajalarga qaramasdan shifoxonada vafot etgan.
Ta’kidlanishicha, janjal kelib chiqqanda har ikki shaxs ham mast holda bo‘lgan.
Ma’lumot o‘rnida, akaning bir nafar, ukaning esa ikki nafar farzandi bor.
Hozirda ukaga nisbatan jinoiy ish qo‘zg‘atilgan bo‘lib, tergovga qadar tekshiruv ishlari boshlangan.
Bundan avval Qarshida chempion yigitning o‘ldirilishida 8 nafar fuqaro ishtirok etgani, ularning orasida maktab o‘quvchilari ham borligi, Qashqadaryoda ikki mast fuqaro uch kishi bilan janjallashib, ularni jarohatlagani hamda Jizzaxda ikki kishi pichoqlanishi oqibatida vafot etgani haqida xabar berilgandi.
Izoh (0)