Qashqadaryo viloyati hokimi Zoir Mirzayev endilikda viloyatda majburiy mehnatga yo‘l qo‘ygan rahbarni — xoh u tibbiyotda bo‘lsin, xoh ta’lim tizimidagi rahbar — shaxsan o‘zi uni ishdan olishini ma’lum qildi, deya xabar berdi “Daryo” muxbiri.
Ta’kidlanishicha, Zoir Mirzayev bu haqda Prezident Shavkat Mirziyoyevning “Yangi O‘zbekiston” gazetasiga bergan intervyusi yuzasidan viloyatda bo‘lib o‘tayotgan yig‘ilishda ma’lum qilgan.
“Afsuski, ta’limda ham rahbarlarni tayinlashda paxta yig‘im-terimidagi xatti-harakatiga qarab, rahbarlikka tayinlaydigan bo‘lib qolgandik. Bu esa o‘zining salbiy natijalarini ko‘rsatdi. Va haligacha buning asoratlarini ko‘ryapmiz”, — dedi viloyat hokimi Zoir Mirzayev.
Hokim, shuningdek, ayni kunda ham viloyatda majburiy mehnatga yo‘l qo‘yilayotganini aytib, “bundan keyin kim majburiy mehnatga yo‘l qo‘ysa, xoh u ta’limda bo‘lsin, xoh tibbiyotda, shaxsan o‘zim uni ishdan olaman”, — dedi.
Eslatib o‘tamiz, avvalroq Qashqadaryo viloyatining Qarshi tumanidagi 6-maktab o‘qituvchilari majburiy mehnatga jalb qilinib, ta’mirdan so‘ng maktab sinfxonalarini tozalashga majburlangani haqida xabar berilgandi.
Izoh (0)