O‘zbekiston Oliy Majlisi Senati Kengashining navbatdagi majlisi 19-avgust kuni bo‘lib o‘tdi, deb xabar bermoqda yuqori palata matbuot xizmati.
Unda Senatning 18-yalpi majlisini 26-avgust kuni chaqirish to‘g‘risida qaror qabul qilingan. Yalpi majlisda quyidagi qonunlar muhokama qilinishi rejalashtirilgan:
- “Sug‘urta faoliyati to‘g‘risida”gi;
- “Qishloq xo‘jaligi kooperativi to‘g‘risida”gi;
- “O‘zbekiston Respublikasi Davlat xavfsizlik xizmati organlari xodimlari kunini belgilash to‘g‘risida”gi;
- “O‘zbekiston Respublikasining Soliq kodeksiga o‘zgartirish va qo‘shimchalar kiritish to‘g‘risida”gi;
- “Umumiy harbiy majburiyat va harbiy xizmat to‘g‘risida“gi O‘zbekiston Respublikasi Qonuniga o‘zgartish va qo‘shimchalar kiritish haqida”gi;
- “O‘zbekiston Respublikasi Sudyalar oliy kengashi to‘g‘risida“gi O‘zbekiston Respublikasi Qonuniga o‘zgartish va qo‘shimchalar kiritish haqida”gi.
Shuningdek, tashqi ishlar vazirining 2021-yil birinchi yarim yillik faoliyatiga doir axboroti ham eshitiladi.
Shu bilan bir qatorda, BMT Bosh assambleyasining 2021-yil 18-maydagi “Orolbo‘yi mintaqasini ekologik innovatsiyalar va texnologiyalar hududi deb e’lon qilish to‘g‘risida”gi maxsus rezolyutsiyasini amalga oshirish chora-tadbirlarining ijrosi ustidan parlament nazoratini olib borish, sud hujjatlari va boshqa organlar hujjatlarining ijro etilishi holati yuzasidan Bosh prokuratura huzuridagi Majburiy ijro byurosiga parlament so‘rovi yuborish to‘g‘risidagi masalalar ko‘rib chiqiladi.
Yalpi majlisda aholi, ayniqsa, yoshlarni jismoniy tarbiya va sport bilan shug‘ullanishga keng jalb etish jarayonida yuzaga kelayotgan muammolar to‘g‘risida Vazirlar Mahkamasiga yuborilgan parlament so‘rovi esa natijalari muhokama qilinadi.
Bundan tashqari, Senatning Budjet va iqtisodiy islohotlar masalalari qo‘mitasining 2020-yildagi va 2021-yilning birinchi yarim yilligidagi faoliyatiga doir hisobotini eshitish hamda Prezidentning “Respublikada o‘simliklar karantini va himoyasi tizimini tubdan takomillashtirish chora-tadbirlari to‘g‘risida”gi farmonini tasdiqlash, Oliy sud tarkibiga o‘zgartirishlar kiritish to‘g‘risidagi masalalar ko‘rib chiqilishi ham nazarda tutilgan.
Qolaversa, Kengash majlisida Markaziy bank tomonidan yangi ko‘rinishdagi 5 000 (besh ming) so‘mlik va 10 000 (o‘n ming) so‘mlik banknotlarning chiqarilishi to‘g‘risidagi masala ko‘rib chiqiladi.
Izoh (0)