Qo‘qon shahar hokimining birinchi o‘rinbosari pora olayotganda qo‘lga olingani ma’lum qilindi

Qo‘qon shahar hokimining birinchi o‘rinbosari A.N. jinoyat ustida qo‘lga olindi, deya xabar qildi “Xabar.uz”.

Unga ko‘ra, mansabdor Qo‘qon mintaqaviy temiryo‘l uzeli moliya bo‘limi boshlig‘i o‘rinbosari O.M. bilan birga ushlangan.

Ma’lum qilinishicha, ikki mansabdor jinoiy til biriktirib, bir tadbirkorga mazkur temiryo‘l uzeli balansida bo‘lgan 2,5 gektar yer maydonidagi bino va inshootlar bo‘yicha o‘tkaziladigan auksion savdolarda uning foydasiga qaror chiqartirib berish evaziga 180 000 AQSh dollari talab qilgan.

Talab qilgan puldan 10 ming dollarini olayotgan paytda ular tegishli organlarning tezkor xodimlari tomonidan qo‘lga olindi.

Ayni paytda ularga nisbatan firibgarlik va pora berishga qasd qilish alomatlari bilan jinoyat ishi qo‘zg‘atilib, qamoqqa olingan. Dastlabki tergov harakatlari o‘tkazilmoqda.

Shahar hokimligining saytida hokimning birinchi o‘rinbosari Abduhaliljon Nurmatov ekani va u ushbu lavozimga 2021-yili tayinlangani qayd etilgan.

“Daryo” so‘roviga javoban Bosh prokuratura bu haqda ma’lumotga ega emasligini ma’lum qildi.

Bundan avval Samarqandda fuqaroni 17 ming dollar evaziga magistraturaga kiritib qo‘yishni va’da qilgan shaxs ushlangani, Bo‘stonliqda bog‘dorchilik uchun ajratilgan 16 gektar yerni 5 million dollarga sotishga uringan shaxslar qo‘lga olingani hamda Toshkentda 186 doza o‘zbek-xitoy vaksinasini 27 million so‘mga sotishga uringan hamshira va uning sherigi qo‘lga olingani haqida xabar berilgandi.