O‘zbekiston tashqi ishlar vaziri Abdulaziz Komilov va Shveysariya Konfederatsiyasi Tashqi ishlar federal maslahatchisi (vaziri) Ignatsio Kassis o‘rtasida 2021-yilning 19-avgust kuni telefon orqali muloqot bo‘lib o‘tdi.
Ma’lum qilinishicha, Tashqi siyosiy idoralar rahbarlari ikki tomonlama hamkorlikning hozirgi holati va uni rivojlantirish istiqbollarini muhokama qildi.
Suhbatda Shveysariya fuqarolarini O‘zbekiston hududi orqali Afg‘onistondan evakuatsiya qilish bilan bog‘liq tashkiliy va texnik masalalarga alohida e’tibor qaratildi.
Ma’lumot uchun, avvalroq O‘zbekiston Prezidenti Shavkat Mirziyoyev va Germaniya prezidenti Frank-Valter Shtaynmayer o‘rtasida bo‘lib o‘tgan telefon suhbati davomida Germaniya, Afg‘oniston va Yevropa Ittifoqi davlatlari fuqarolarini Toshkent aeroporti orqali tranzit qilib evakuatsiya qilish ishlarini davom ettirish to‘g‘risida kelishuvga erishilgandi.
Shundan so‘ng Germaniya yevropalik va afg‘onistonlik fuqarolarni Toshkent aeroporti orqali evakuatsiya qilishni boshladi. Bu uchun O‘zbekiston tomoni alohida terminal ajratdi. Tashqi ishlar vazirligining rasmiy vakili axborotiga ko‘ra, evakuatsiya qilinganlarning barchasi Germaniyaga ketgunga qadar aeroport tranzit hududida bo‘ladi.
Mavzuga doir:
- Shavkat Mirziyoyev Angela Merkel bilan fuqarolarni Afg‘onistondan O‘zbekiston orqali evakuatsiya qilish jarayonini muhokama qildi
- Foto: Toshkent orqali evakuatsiya qilinayotgan Yevropa Ittifoqi va Afg‘oniston fuqarolari
- Video: Afg‘onistondagi chet el fuqarolarining Toshkent orqali evakuatsiya qilinishi
Izoh (0)