DTMning mandat saytidagi ro‘yxatda Prezident granti uchun da’vogarlik qiladigan abituriyentlar ro‘yxati e’lon qilindi. Unga ko‘ra, 185,85 balldan yuqori ko‘rsatkichga erishgan 233 nafar abituriyent Prezident grantiga da’vogarlik qiladigan bo‘ldi.
Bunda 200-o‘rindagi abituriyent bilan bir xil ball to‘plagan barcha abituriyentlar ushbu grantga da’vogarlik qiladi. Natijalarga ko‘ra, 185-o‘rindan 233-o‘ringacha abituriyentlar bir xil 185,85 ball to‘plashgan, shu sababli barchasi Prezident grantiga da’vogarlik qilishadi.
Shuningdek, respublika bo‘ylab jami 75 nafar abituriyent eng maksimal 189 ball to‘plagan.
Eslatib o‘tamiz, Prezident grantini olganlar garchi kontraktga kirgan bo‘lsa ham, davlat granti asosida o‘qiydi.
Prezident grantiga da’vogarlik qilayotgan abituriyentlarning 73 nafari Toshkent davlat yuridik universitetiga to‘g‘ri keladi.
Ushbu natijalar koronavirusga chalingan yoki test kuni isitmasi yuqori bo‘lgan abituriyentlar uchun o‘tadigan qo‘shimcha test sinovlaridan keyin o‘zgarishi mumkin.
Bundan avval O‘zbekistonda imtihon kuni tana harorati yuqori bo‘lgan va koronavirusga chalingan abituriyentlar uchun qayta test sinovi tashkil etilishi hamda DTM biologiya fanidan Milliy sertifikat uchun topshirilgan test natijalarini bekor qilgani haqida xabar berilgandi.
Izoh (0)