Ўзбекистон Олий Мажлиси Сенати Кенгашининг навбатдаги мажлиси 19 август куни бўлиб ўтди, деб хабар бермоқда юқори палата матбуот хизмати.
Унда Сенатнинг 18-ялпи мажлисини 26 август куни чақириш тўғрисида қарор қабул қилинган. Ялпи мажлисда қуйидаги қонунлар муҳокама қилиниши режалаштирилган:
- «Суғурта фаолияти тўғрисида»ги;
- «Қишлоқ хўжалиги кооперативи тўғрисида»ги;
- «Ўзбекистон Республикаси Давлат хавфсизлик хизмати органлари ходимлари кунини белгилаш тўғрисида»ги;
- «Ўзбекистон Республикасининг Солиқ кодексига ўзгартириш ва қўшимчалар киритиш тўғрисида»ги;
- «Умумий ҳарбий мажбурият ва ҳарбий хизмат тўғрисида«ги Ўзбекистон Республикаси Қонунига ўзгартиш ва қўшимчалар киритиш ҳақида»ги;
- «Ўзбекистон Республикаси Судьялар олий кенгаши тўғрисида«ги Ўзбекистон Республикаси Қонунига ўзгартиш ва қўшимчалар киритиш ҳақида»ги.
Шунингдек, ташқи ишлар вазирининг 2021 йил биринчи ярим йиллик фаолиятига доир ахбороти ҳам эшитилади.
Шу билан бир қаторда, БМТ Бош ассамблеясининг 2021 йил 18 майдаги «Оролбўйи минтақасини экологик инновациялар ва технологиялар ҳудуди деб эълон қилиш тўғрисида»ги махсус резолюциясини амалга ошириш чора-тадбирларининг ижроси устидан парламент назоратини олиб бориш, суд ҳужжатлари ва бошқа органлар ҳужжатларининг ижро этилиши ҳолати юзасидан Бош прокуратура ҳузуридаги Мажбурий ижро бюросига парламент сўрови юбориш тўғрисидаги масалалар кўриб чиқилади.
Ялпи мажлисда аҳоли, айниқса, ёшларни жисмоний тарбия ва спорт билан шуғулланишга кенг жалб этиш жараёнида юзага келаётган муаммолар тўғрисида Вазирлар Маҳкамасига юборилган парламент сўрови эса натижалари муҳокама қилинади.
Бундан ташқари, Сенатнинг Бюджет ва иқтисодий ислоҳотлар масалалари қўмитасининг 2020 йилдаги ва 2021 йилнинг биринчи ярим йиллигидаги фаолиятига доир ҳисоботини эшитиш ҳамда Президентнинг «Республикада ўсимликлар карантини ва ҳимояси тизимини тубдан такомиллаштириш чора-тадбирлари тўғрисида»ги фармонини тасдиқлаш, Олий суд таркибига ўзгартиришлар киритиш тўғрисидаги масалалар кўриб чиқилиши ҳам назарда тутилган.
Қолаверса, Кенгаш мажлисида Марказий банк томонидан янги кўринишдаги 5 000 (беш минг) сўмлик ва 10 000 (ўн минг) сўмлик банкнотларнинг чиқарилиши тўғрисидаги масала кўриб чиқилади.
Изоҳ (0)