Eritrazma kasalligi nima sababdan paydo bo‘ladi? Mutaxassis javob beradi

“Eritrazma” yunon tilidan tarjima qilinganda “qizil rang” ma’nosini anglatadi. Kasallik qo‘zg‘atuvchisi inson terisining normal mikroflorasining bir qismi bo‘lgan corynebacterium minutissimum hisoblanadi. Ular inson terisining o‘layotgan hujayralari bilan oziqlanadi, agarda kasallikni keltirib chiqaruvchi omillar paydo bo‘lsa, patogen xususiyatlari rivojlanadi.

Kasallik qo‘zg‘atuvchisining faollashish sabablari:

• teri himoya xususiyatining zaiflashishi;
• issiq havo va yuqori namlik; 
• terlashning buzilishi;
• qandli diabet kabi surunkali kasalliklarning mavjudligi;
• terida har xil yara-chaqa, toshmalar paydo bo‘lishi;
• teri tozaligiga e’tibor bermaslik;
• semizlik. 

Eritrazma kasalligining yuqumliligi juda past, rivojlanishiga esa shaxsiy gigiyenaga rioya qilmaslik turtki bo‘ladi. Kasallikning boshlanishi teri ustida och jigarrang, ba’zida jigarrang, sarg‘ish, to‘q qizil dog‘larning paydo bo‘lishi bilan tavsiflanadi. Shu bilan birga, teri sirti silliq bo‘lib qoladi, yallig‘lanmaydi. Dog‘larning cheti dumaloq yoki qirrali, sekin asta ko‘payib, bir-biri bilan qo‘shilib katta dog‘ hosil qiladi. Ko‘pchilikda teri kasalliklariga xos bo‘lgan qichishish yoki qizarish bo‘lmaydi, shuning uchun bemorlar yaralarni dermatologga ko‘rsatishga shoshmaydi. Noqulaylik odatda terlash sababli yoki ortiqcha vazndan aziyat chekadiganlarda paydo bo‘ladi. Issiq havo eritrazma jarayoniga salbiy ta’sir ko‘rsatadi. Zararlangan teri namlana boshlaydi, shishib ketadi va mayda qontalashlar paydo bo‘lishi mumkin. Agar infeksiya chov sohasida bo‘lsa, terida mayda pufakchalar paydo bo‘ladi, teri suvlanadi. Kasallik belgilari ba’zida yillar davomida yo‘qolmaydi, qo‘zg‘alish davri yozda yuz beradi. Toshmalar ko‘pincha chov sohasi burmalari orasida, son ichki qismida, qo‘ltiq sohasida, sut bezlari ostidagi burmalarda, qorin burmalari va oyoq panjalari orasida bo‘ladi.

Davo choralari

Antimikrob ta’sirga ega bo‘lgan maz, kremlardan foydalaniladi. Eritrazma kasalligini davolashda ultrabinafsha nurlari faol ishlatiladi, bu dezinfeksiyalash va quritish natijasini beradi. Issiq kunlar mavsumida shifokor bemorga “quyosh hammomi” muolajasini tavsiya etishi mumkin, uni kun davomida bir necha marta olish kerak.

E’tiboringizni muhim masalaga qaratmoqchiman, eritrazma kasalligi boshqa teri kasalliklariga juda o‘xshash. Shuningdek, boshqa teri kasalliklari bilan qo‘shilib kelishi mumkin bo‘lganligi uchun shifokorga murojaat qilib, uning kuzatuvida davolanish kerak.

Shifokor Xurshid A’zamxo‘jayev tavsiyalari asosida tayyorlandi.