Эритразма касаллиги нима сабабдан пайдо бўлади? Мутахассис жавоб беради

«Эритразма» юнон тилидан таржима қилинганда «қизил ранг» маъносини англатади. Касаллик қўзғатувчиси инсон терисининг нормал микрофлорасининг бир қисми бўлган corynebacterium minutissimum ҳисобланади. Улар инсон терисининг ўлаётган ҳужайралари билан озиқланади, агарда касалликни келтириб чиқарувчи омиллар пайдо бўлса, патоген хусусиятлари ривожланади.

Касаллик қўзғатувчисининг фаоллашиш сабаблари:

• тери ҳимоя хусусиятининг заифлашиши;
• иссиқ ҳаво ва юқори намлик; 
• терлашнинг бузилиши;
• қандли диабет каби сурункали касалликларнинг мавжудлиги;
• терида ҳар хил яра-чақа, тошмалар пайдо бўлиши;
• тери тозалигига эътибор бермаслик;
• семизлик. 

Эритразма касаллигининг юқумлилиги жуда паст, ривожланишига эса шахсий гигиенага риоя қилмаслик туртки бўлади. Касалликнинг бошланиши тери устида оч жигарранг, баъзида жигарранг, сарғиш, тўқ қизил доғларнинг пайдо бўлиши билан тавсифланади. Шу билан бирга, тери сирти силлиқ бўлиб қолади, яллиғланмайди. Доғларнинг чети думалоқ ёки қиррали, секин аста кўпайиб, бир-бири билан қўшилиб катта доғ ҳосил қилади. Кўпчиликда тери касалликларига хос бўлган қичишиш ёки қизариш бўлмайди, шунинг учун беморлар яраларни дерматологга кўрсатишга шошмайди. Ноқулайлик одатда терлаш сабабли ёки ортиқча вазндан азият чекадиганларда пайдо бўлади. Иссиқ ҳаво эритразма жараёнига салбий таъсир кўрсатади. Зарарланган тери намлана бошлайди, шишиб кетади ва майда қонталашлар пайдо бўлиши мумкин. Агар инфекция чов соҳасида бўлса, терида майда пуфакчалар пайдо бўлади, тери сувланади. Касаллик белгилари баъзида йиллар давомида йўқолмайди, қўзғалиш даври ёзда юз беради. Тошмалар кўпинча чов соҳаси бурмалари орасида, сон ички қисмида, қўлтиқ соҳасида, сут безлари остидаги бурмаларда, қорин бурмалари ва оёқ панжалари орасида бўлади.

Даво чоралари

Антимикроб таъсирга эга бўлган маз, кремлардан фойдаланилади. Эритразма касаллигини даволашда ультрабинафша нурлари фаол ишлатилади, бу дезинфекциялаш ва қуритиш натижасини беради. Иссиқ кунлар мавсумида шифокор беморга «қуёш ҳаммоми» муолажасини тавсия этиши мумкин, уни кун давомида бир неча марта олиш керак.

Эътиборингизни муҳим масалага қаратмоқчиман, эритразма касаллиги бошқа тери касалликларига жуда ўхшаш. Шунингдек, бошқа тери касалликлари билан қўшилиб келиши мумкин бўлганлиги учун шифокорга мурожаат қилиб, унинг кузатувида даволаниш керак.

Шифокор Хуршид Аъзамхўжаев тавсиялари асосида тайёрланди.