Farg‘ona viloyati hokimi Xayrullo Bozorov Farg‘ona shahri va tumani tutashgan joyda, xalqaro aeroport yaqinidagi “Ilg‘or” MFY hududida barpo etilishi rejalashtirilayotgan ekoshahar hamda kichik sanoat hududi loyihasi muhokamasini o‘tkazdi. Bu haqda “Daryo”ga viloyat hokimligi axborot xizmati xabar berdi.
Qayd etilishicha, viloyat hokimi o‘rinbosarlari, shahar hokimi Mirzohid Ubaydullayev, viloyatdagi qurilish va infratuzilmalar barpo etishga aloqador tegishli boshqarma va tashkilotlar rahbarlari viloyat rahbariga ushbu loyihaning iqtisodiy-texnik ko‘rsatkichlari haqida ma’lumot bergan.
“Eski aerodom hududidan 150 metrlik muhofaza zonasi qoldirgan holda 24 ming ish o‘rni yaratiladigan kichik sanoat hududi joylashtiriladigan, so‘ngra 10 gektar maydondan iborat yashil hudud bilan qoplanib, 40 ming aholiga mo‘ljallangan 7—25 qavatli 313 ta ko‘p qavatli turar joy va ijtimoiy obyektlar bilan davom etadigan ekoshahar loyihasi jami 300 gektar maydonda amalga oshiriladi”, — deyiladi hokimlik axborot xizmati bergan ma’lumotda.
Aytilishicha, viloyat hokimi loyihani takomillashtirish yuzasidan o‘z fikrlarini bildirib, shaharchaga keladigan asosiy yo‘llarni kelajakda ham yetarli kenglikda bo‘lishini, qurilishi rejalashtirilayotgan maktab, bog‘cha hamda boshqa ijtimoiy obyektlarning kutilayotgan aholi soniga mutanosib xizmat ko‘rsata olishi lozimligini, sanoat hududida joylashtiriladigan ishlab chiqarish korxonalarining ekoshahar konsepsiyasiga uyg‘un shaklda ekologik toza texnologiyalarga asoslangan bo‘lishini ta’minlash yuzasidan ko‘rsatmalar bergan.
Xayrullo Bozorov mas’ullarga ushbu shaharcha o‘rtasidan oqib o‘tishi rejalashtirilgan kanalni qazish ishlariga kirishish, shaharchadagi yashil maydon hududlari rejasini belgilab, ekoshaharning obodonlashtirish loyihasini ishlab chiqish, bunda yashil maydonlar va daraxtzor orasida sayr qilish va velosport bilan shug‘ullanish uchun yo‘lakchalar bo‘lishini hisobga olish, kichik sanoat hududini 50 sotixdan lotlarga ajratib, tashabbuskorlarni aniqlash hamda onlayn auksion orqali savdoga chiqarish va boshqa topshiriqlarni belgilab bergan.
Izoh (0)