Qashqadaryo viloyatining Qarshi tumanida faoliyat yurituvchi fermerning davlat rejasidan tashqari tortib olingan g‘allasi qaytarildi. Bu haqda “Daryo”ga Adliya vazirligi axborot xizmati rahbari Sevara O‘rinboyeva ma’lum qildi.
Sevara O‘rinboyevaning ma’lumot berishicha, fermerning huquqi “Fermerga madad” huquqiy aksiyasi doirasida amalga oshirilayotgan ishlar paytida tiklangan.
“Daryo” muxbiri bilan suhbatlashgan Qarshi tumani prokurori Alisher Mirzayevning ma’lumot berishicha, fermer huquqi tiklanib, g‘allasi qaytarib berilgach, unga adolatni tiklashda ko‘maklashgan viloyat prokuraturasi hamda Qarshi tuman prokuroriga minnatdorlik xati yozgan.
“Jami 78 tonna g‘allamni tortib olishgandi. Shundan 40 tonnasi davlat rejasi edi. Davlat rejasiga davlat tomonidan belgilangan narx bo‘yicha haq to‘lanishiga roziman. Ammo rejadan tashqari 38 tonna g‘allamni ham olib qo‘yishganiga norozilik bildirgandim. Maqola saytda e’lon qilingach, 30 tonna g‘allamni qaytarib oldim. To‘g‘rirog‘i, tonnasiga bozor narxida — 3 million 200 ming so‘mdan haq to‘lashdi. Davlat tomonidan belgilangan narx esa tonnasiga 1 million 500 ming so‘m edi”, — deydi fermer Sodiq Mamatov.
Eslatib o‘tamiz, fermer Sodiq Mamatovning g‘allasi tortib olingani jamoatchilikka ma’lum bo‘lgach, Qarshi tumani hokimligi maqolaga munosabat bildirgandi. O‘shanda hokimlik axborot xizmati rahbari To‘lqin Turdiyev “Klaster mas’ullari fermerni rozi qilamiz deyishyapti. Davlat narxiga 10 foiz qo‘shib berib, fermer bilan kelishishlarini aytdi”, — degandi.
Qayd etish lozim, Qarshi tumanida fermerning yetishtirgan g‘allasi tortib olinishi yangilik emas. “Daryo” nashri avval ham shunday voqea haqida so‘z yuritib, tuman hokimi g‘alla rejasini bajarish uchun chorvachilik fermer xo‘jaligining oziqa g‘allasini ham tortib olganini oshkor qilgandi.
Mavzuga doir: Qarshi tuman hokimi Maqsuda Mustafoyeva hayfsan oldi
Izoh (0)