Фарғона вилояти ҳокими Хайрулло Бозоров Фарғона шаҳри ва тумани туташган жойда, халқаро аэропорт яқинидаги «Илғор» МФЙ ҳудудида барпо этилиши режалаштирилаётган экошаҳар ҳамда кичик саноат ҳудуди лойиҳаси муҳокамасини ўтказди. Бу ҳақда «Дарё»га вилоят ҳокимлиги ахборот хизмати хабар берди.
Қайд этилишича, вилоят ҳокими ўринбосарлари, шаҳар ҳокими Мирзоҳид Убайдуллаев, вилоятдаги қурилиш ва инфратузилмалар барпо этишга алоқадор тегишли бошқарма ва ташкилотлар раҳбарлари вилоят раҳбарига ушбу лойиҳанинг иқтисодий-техник кўрсаткичлари ҳақида маълумот берган.
«Эски аэродом ҳудудидан 150 метрлик муҳофаза зонаси қолдирган ҳолда 24 минг иш ўрни яратиладиган кичик саноат ҳудуди жойлаштириладиган, сўнгра 10 гектар майдондан иборат яшил ҳудуд билан қопланиб, 40 минг аҳолига мўлжалланган 7—25 қаватли 313 та кўп қаватли турар жой ва ижтимоий объектлар билан давом этадиган экошаҳар лойиҳаси жами 300 гектар майдонда амалга оширилади», — дейилади ҳокимлик ахборот хизмати берган маълумотда.
Айтилишича, вилоят ҳокими лойиҳани такомиллаштириш юзасидан ўз фикрларини билдириб, шаҳарчага келадиган асосий йўлларни келажакда ҳам етарли кенгликда бўлишини, қурилиши режалаштирилаётган мактаб, боғча ҳамда бошқа ижтимоий объектларнинг кутилаётган аҳоли сонига мутаносиб хизмат кўрсата олиши лозимлигини, саноат ҳудудида жойлаштириладиган ишлаб чиқариш корхоналарининг экошаҳар концепциясига уйғун шаклда экологик тоза технологияларга асосланган бўлишини таъминлаш юзасидан кўрсатмалар берган.
Хайрулло Бозоров масъулларга ушбу шаҳарча ўртасидан оқиб ўтиши режалаштирилган канални қазиш ишларига киришиш, шаҳарчадаги яшил майдон ҳудудлари режасини белгилаб, экошаҳарнинг ободонлаштириш лойиҳасини ишлаб чиқиш, бунда яшил майдонлар ва дарахтзор орасида сайр қилиш ва велоспорт билан шуғулланиш учун йўлакчалар бўлишини ҳисобга олиш, кичик саноат ҳудудини 50 сотихдан лотларга ажратиб, ташаббускорларни аниқлаш ҳамда онлайн аукцион орқали савдога чиқариш ва бошқа топшириқларни белгилаб берган.
Изоҳ (0)