Germaniya, Niderlandiya va Chexiya samolyotlari uchish-qo‘nish yo‘lagidagi olomon tufayli Kobul aeroportiga qo‘na olmadi, deya xabar bermoqda “Kommersant” BBC’ga tayanib.
“Kobuldan odamlarni evakuatsiya qilish uchun yuborilgan harbiy samolyot ushlanib qolmoqda… Bu Kobul aeroportidagi ma’lum bir sharoitlar bilan bog‘liq”, — deyiladi Niderlandiya Mudofaa vazirligi xabarida.
Chexiyaning ikkita samolyoti Ozarbayjonga yo‘l olgan, Germaniya samolyoti esa yonilg‘i olish uchun O‘zbekistonga ketgan.
Kobul aeroportida murakkab vaziyat yuzaga kelgan. Vatanini tezroq tark etish istagidagi afg‘onlar 16-avgust, dushanba kuni uchish-qo‘nish yo‘lagiga yugurib chiqib, hatto, AQSh Harbiy-havo kuchlarining harakatlanib ketayotgan samolyotining ortidan yugurgan. Oxir-oqibat samolyotning aeroportdan uchib ketishini to‘xtatishga to‘g‘ri kelgan.
Al-Jazeera ma’lumotlariga ko‘ra, Kobul aerportidagi tartibsizliklar chog‘ida yetti kishi halok bo‘lgan. Aeroportdagi xavfsizlikni AQSh armiyasi ta’minlamoqda. Shuningdek, u yerda Britaniya harbiylari ham bor. Harbiy xizmatchilarning vazifasi — Kobuldan chet elliklarni, shuningdek, xorijda boshpanaga ega bo‘lgan afg‘onlarni tezkorlik bilan evakuatsiya qilish.
15-avgust kuni “Tolibon” jangarilari Kobulga kirdi va Afg‘onistonning butun hududini nazorat ostiga olganini e’lon qildi. Shu kuniyoq mamlakat prezidenti Ashraf G‘ani iste’foga chiqib, mamlakatni tark etdi. U o‘z qarorini “qon to‘kilishiga yo‘l qo‘ymaslik istagi bilan izohladi.
Avvalroq yuzlab odamlar Kobul aeroportida Afg‘onistondan uchib ketayotgan so‘nggi samolyotlarga chiqib olishga urindi. Bir necha kishi halok bo‘lgani xabar berilgan edi. Shuningdek, aviakompaniyalar Afg‘oniston havo hududini chetlab uchishni boshladi.
Izoh (0)