Afg‘oniston sobiq ichki ishlar vaziri “Tolibon” tuzayotgan vaqtinchalik hukumat rahbarligiga tayinlanganini inkor etdi

Afg‘oniston sobiq ichki ishlar vaziri, Vashingtondagi Milliy mudofaa universiteti professori Ali Ahmad Jaloliy mamlakat “Tolibon” nazoratiga o‘tganidan keyin tuzilayotgan vaqtinchalik hukumatga rahbarlik qilishi haqidagi xabarlarni rad etdi, deya xabar qilgan “Interfaks”.

“Ijtimoiy tarmoqlarda meni muvaqqat hukumatning rahbarligiga tayinlanganim haqida turli mishmishlar tarqaldi. Bundan xabarim yo‘q, hech kim meni taklif qilmagan va ushbu lavozimni egallashga qiziqish bildirmaganman”, — deya yozgan Jaloliy Twitter’dagi sahifasida.

“Ayrim yolg‘on axborot tarqatuvchilar soxta sahifalarda mening nomimdan va bir vaqtlar aytgan so‘zlarimdan foydalanib, uydirma gaplar yozmoqda. Men ushbu xabarlarni feyk deb hisoblayman. Bunday axborotlarga ishonmang”, — degan sobiq vazir.

Eslatib o‘tamiz, “Tolibon” harakati 15-avgustda Afg‘oniston poytaxti Kobulni egalladi va mamlakatda to‘liq nazorat qilishni boshladi. Prezident Ashraf G‘ani iste’foga chiqqanini e’lon qilib, Afg‘onistonni tark etgan.

Shu kunning o‘zida “Tolibon” Afg‘onistonda hokimiyat tepasiga qaytganidan keyin tuziladigan vaqtinchalik hukumatga rahbarlik qilish Ali Ahmad Jaloliyga topshirilishi haqida xabarlar tarqalgan.

Shuningdek, Tolo News telekanali “Tolibon” vakillarining Dohada Afg‘onistonda yangi hukumat shakllantirish yuzasidan muzokaralar olib borayotgani va mazkur muloqot bo‘yicha yaqin vaqt ichida rasmiy ma’lumot e’lon qilinishi haqida xabar bergan.

“Tolibon” vakilining telekanalga bergan axborotiga ko‘ra, harakat yetakchilari Afg‘oniston siyosiy kuchlari va dunyo hamjamiyati birlashmalari bilan mazkur mavzuda muloqot olib bormoqda.

Tolo News’ning qayd etishicha, “Tolibon” muloqotlar davomida hukumatning kelajagi, tuzilmasi va nomi borasida muhokamalar o‘tkazilmoqda.