Olmaliqda 49 kishi muzqaymoqdan zaharlangani bo‘yicha jinoiy ish qo‘zg‘atildi

Toshkent viloyatining Olmaliq shahrida 49 kishi muzqaymoqdan zaharlangani haqida xabar berilgan edi. Bosh prokuratura matbuot xizmati holat yuzasidan jinoyat ishi qo‘zg‘atilganini ma’lum qildi.

Qayd etilishicha, jinoyat ishi Jinoyat kodeksining 257-1-moddasi (sanitariyaga oid qonunchilikni yoki epidemiyaga qarshi kurash qoidalarini buzish) bilan qo‘zg‘atildi. Olmaliq shahar IIB TB tomonidan tergov harakatlari olib borilmoqda.

Sanitariya va epidemiologiya boshqarmasi xabariga ko‘ra, odamlarning zaharlanishiga xususiy tadbirkor tomonidan ishlab chiqarilgan muzqaymoq sababchi bo‘lgan. 15-avgust holatiga ko‘ra, ularning 31 nafariga ahvoli yaxshi bo‘lgani sababli uyiga ruxsat berilgan. Yana besh nafar bemor davolanishda, ahvoli o‘rtacha. Ohangaron shahar tibbiyot birlashmasiga esa 13 kishi shu tashxis bilan yotqizilgan. Ularning holati o‘rtacha og‘ir, muolajalar davom etirilmoqda.

Bundan avval Toshkent viloyatining Oqqo‘rg‘on tumanidagi 5-sonli davlat maktabgacha ta’lim tashkilotida 12-avgust kuni 25 nafar bola zaharlanib, shifoxonaga yotqizilgani haqida xabar berilgan edi. 13-avgust kuni ular soni 30 nafarga yetgandi. Ushbu bog‘cha tarbiyalanuvchilari zaharlanganligi holati yuzasidan Jinoyat kodeksining 257-1-moddasi (sanitariyaga oid qonunchilikni yoki epidemiyaga qarshi kurash qoidalarini buzish) bilan jinoyat ishi qo‘zg‘atildi. Tergov harakatlari olib borilmoqda.