“Ixtilofga aloqador barcha tomonlarni kuch ishlatishdan tiyilishga hamda tinch aholi orasida qurbonlar bo‘lishiga yo‘l qo‘ymaslikka chaqiramiz” — Maqsuda Vorisova

Oliy Majlis Qonunchilik palatasining Fuqarolarning sog‘lig‘ini saqlash masalalari qo‘mitasi raisining o‘rinbosari, Xalq demokratik partiyasidan prezidentlikka nomzod Maqsuda Vorisova Afg‘onistondagi vaziyat bo‘yicha munosabat bildirib, ixtilofga aloqador barcha tomonlarni kuch ishlatishdan tiyilishga hamda tinch aholi orasida qurbonlar bo‘lishiga yo‘l qo‘ymaslikka chaqirdi.

“Barchamiz guvoh bo‘lib, xavotir bilan kuzatayotganimiz Afg‘oniston voqealari, albatta, butun xalqimizni tashvishga solmoqda. O‘zbekiston hukumati Afg‘onistondagi vaziyat bo‘yicha amalga oshirayotgan faol siyosiy va diplomatik sa’y-harakatlar xalqimizning xohish-istagiga ham mos bo‘lib, xalqimiz xavfsizligini ta’minlashga qaratilgan, deb o‘ylayman.

Qo‘shni mamlakatdagi holat Xalq demokratik partiyasi faollarida ham chuqur xavotir uyg‘otmoqda. Koronavirus pandemiyasining yangi to‘lqini sharoitida keskinlikning kuchayishi afg‘on xalqi hayotini yanada murakkablashtirmoqda. Ixtilofga aloqador barcha tomonlarni kuch ishlatishdan tiyilishga hamda tinch aholi orasida qurbonlar bo‘lishiga yo‘l qo‘ymaslikka chaqiramiz”, — degan u.

Maqsuda Vorisovaning ta’kidlashicha, urush afg‘on xalqining tanlovi emas. Keskin nizoli vaziyat oqibatida minglab afg‘onistonliklar qochoqqa aylandi, begunoh insonlar, bolalar, ayollar, qariyalar ko‘chada qoldi. Bu holat davom etmasligi uchun barcha imkoniyatlarni ishga solish zarur.

“2020-yilning sentabr oyida boshlangan bevosita tinchlik jarayoni, afg‘onlararo to‘g‘ridan to‘g‘ri muloqotni davom ettirish muhim, deb hisoblaymiz. Endilikda ko‘p narsa Afg‘oniston xalqining mustahkam irodasi, birligi va qat’iyatiga bog‘liq.

Bu mamlakatda tinchlikni ta’minlash faqatgina xavfsizlik muammolarini hal qilishdangina iborat emas. Iqtisodiyotni tiklamasdan, aholining murakkab ijtimoiy muammolarini hal qilmay turib, bu mamlakatda tinchlikka erishib bo‘lmaydi. Buning uchun, albatta, xalqaro tashkilotlar, insonparvarlik yordamini ko‘rsatuvchi uyushmalar faol pozitsiyada bo‘lishlari talab qilinadi”, — degan Maqsuda Vorisova va barqaror tinchlikni o‘rnatish bo‘yicha siyosiy jarayonlar Afg‘oniston xalqi manfaatini ko‘zlagan holda olib borilishi lozimligini ta’kidlagan.