Toshkent shahri Yangihayot tumanida 8 oylik bolasini 7 ming dollarga sotayotgan ayol va uning dugonasiga sud hukm chiqardi. Bu haqda “Yangi Davr” informatsion dasturida xabar qilindi.
Ma’lum qilinishicha, ayol 2021-yilning 21-may kuni dugonasi bilan til biriktirib, o‘zining 8 oylik farzandini 4 ming dollarga sotmoqchi bo‘lgan. Ammo ayolning dugonasi yashirincha xaridordan yana 3 ming dollar talab qilgan.
Shundan so‘ng xaridor holat bo‘yicha prokuratura Departamentining Yangihayot bo‘limiga murojaat qilgan.
O‘tkazilgan tezkor tadbir natijasida ayol va uning dugonasi qo‘lga olingan.
Holat yuzasidan sud tomonidan Jinoyat kodeksining 135-moddasi 3-qismi “a” bandiga (o‘n sakkiz yoshga to‘lmaganligi aybdorga ayon bo‘lgan shaxsga nisbatan sodir etilgan odam savdosi) ko‘ra, ayolning biriga 3 yil 6 oy, boshqasiga nisbatan 5 yil muddatga ozodlikdan mahrum qilish jazosi tayinlandi.
Qayd etilishicha, odam savdosi qurboni bo‘lgan bola tegishli organga topshirildi.
Bundan avval Farg‘onada besh yoshli o‘g‘lini 5 ming dollarga sotishga uringan ayol qo‘lga olingani, Toshkent aeroportida uch nafar ayol Turkiyaga fohishalikka yuborilayotganda to‘xtatib qolingani hamda Andijonda to‘rt oylik farzandini 5200 dollarga sotishga uringan ayolga sud hukmi o‘qilgani haqida xabar berilgandi.
Izoh (0)