Тошкент шаҳри Янгиҳаёт туманида 8 ойлик боласини 7 минг долларга сотаётган аёл ва унинг дугонасига суд ҳукм чиқарди. Бу ҳақда «Янги Давр» информацион дастурида хабар қилинди.
Маълум қилинишича, аёл 2021 йилнинг 21 май куни дугонаси билан тил бириктириб, ўзининг 8 ойлик фарзандини 4 минг долларга сотмоқчи бўлган. Аммо аёлнинг дугонаси яширинча харидордан яна 3 минг доллар талаб қилган.
Шундан сўнг харидор ҳолат бўйича прокуратура Департаментининг Янгиҳаёт бўлимига мурожаат қилган.
Ўтказилган тезкор тадбир натижасида аёл ва унинг дугонаси қўлга олинган.
Ҳолат юзасидан суд томонидан Жиноят кодексининг 135-моддаси 3-қисми «а» бандига (ўн саккиз ёшга тўлмаганлиги айбдорга аён бўлган шахсга нисбатан содир этилган одам савдоси) кўра, аёлнинг бирига 3 йил 6 ой, бошқасига нисбатан 5 йил муддатга озодликдан маҳрум қилиш жазоси тайинланди.
Қайд этилишича, одам савдоси қурбони бўлган бола тегишли органга топширилди.
Бундан аввал Фарғонада беш ёшли ўғлини 5 минг долларга сотишга уринган аёл қўлга олингани, Тошкент аэропортида уч нафар аёл Туркияга фоҳишаликка юборилаётганда тўхтатиб қолингани ҳамда Андижонда тўрт ойлик фарзандини 5200 долларга сотишга уринган аёлга суд ҳукми ўқилгани ҳақида хабар берилганди.
Изоҳ (0)