Qashqadaryoda hokim Zoir Mirzayev qabulida bo‘lgan fuqaro uchun sarflanajak xarajatlar shikoyatchi fuqaro yashovchi tuman hokimlari tomonidan qoplanishi yo‘lga qo‘yiladi. Bu haqda viloyat hokimligi axborot xizmati ma’lum qildi.
Hokimlik axborot xizmati rahbari Ahror Sodiqovning “Daryo”ga aniqlik kiritishicha, hokim bu haqda Xalq deputatlari viloyat kengashining navbatdagi sessiyasida so‘z yuritgan.
“Endilikda qabulga kelgan fuqarolar uchun stol-stul qilamiz-da, choy va kofe damlaydigan apparat qo‘yib, fuqarolarga xizmat ko‘rsatamiz. Qabulga kelgan fuqaro salqin xonada, choy, kofe ichib, shokolad yeb o‘tiradi. Oy yakunida esa har bir tuman va shahar hokimlariga xat yuborib, ‘bu oy tumaningizdan qabulga shuncha fuqaro keldi va shu fuqarolar uchun shuncha xarajat qilindi, deb sarf-xarajatni ko‘rsatamiz. Hamda pulini hokimdan olamiz”, — deydi viloyat hokimi Zoir Mirzayev.
Zoir Mirzayevning aytishicha, viloyatda fuqarolarni qabul qilishda shunday tartib yo‘lga qo‘yiladi.
Viloyat hokimi, shuningdek, har bir tuman va shaharga borib, fuqarolarni qabul qilishda fuqaro muammosiga javobgar mas’ul — xoh u hokim, xoh viloyatdagi tashkilot, boshqarma boshlig‘i uzoqroqda bo‘lsa ham Zoom orqali qabulga bog‘lanib, yechimi haqida o‘zi ma’lumot berishini ta’kidlagan.
“Bunday tartibda ishlashdan maqsad hokimlarni sergaklikka chaqirish va viloyat hokimligiga qabul uchun kelib kelayotgan fuqarolarni monitoring qilish hisoblanadi. Kuni kecha 20 nafar murojaatchi kelib, ‘bizga arzonlashtirilgan uy-joy bering’, deyapti. Ularni qabul qilib, uy-joy berish masalasi hokimlik zimmasidan olinganini, arzon uy-joy xaridiga falonchi tashkilot mas’ul deb yo‘l-yo‘riq ko‘rsatdik. Fuqaro ‘tumanda bizga shuni tushuntirmagan-da’, deb chiqib ketyapti. Ko‘ryapsizmi, fuqaroga bir og‘iz to‘g‘ri gapni, maslahatni bermaydigan rahbarlar ham bor. Men natijaga erishish uchun bundan boshqa yo‘lni ko‘rmayapman”, — degan viloyat rahbari.
Izoh (0)