Qashqadaryo viloyatining Qarshi tumanida maktab o‘qituvchilari majburiy mehnatga jalb qilingani xabar berildi. Bu haqda “Daryo”ga ma’lum qilgan o‘qituvchilarning aytishicha, holat tumandagi 6-sonli umumta’lim maktabida sodir bo‘lgan.
“Ikki kundan beri direktor opa Feruza Ahmedovaning qistovi bilan ishlashga majbur bo‘lyapmiz. Maktabimizda ta’mirlash ishlari ketmoqda. Biroq hali tugallanmagan, shuningdek, ustalarning buzib-tuzishidan qolgan chiqindilarni tozalashga maktab o‘qituvchilari jalb qilingan”, — deydi majburiy mehnatdan jabrlanayotganini aytgan o‘qituvchi Umarali Avazov.
“Daryo” muxbiri bilan suhbatlashgan o‘qituvchining aytishicha, majburiy mehnat ishlariga 40 nafarga yaqin erkak o‘qituvchi va 10—15 nafar ayol o‘qituvchi jalb etilgan.
“Ayollar ko‘proq supur-sidir ishlarini bajarmoqda. Erkak o‘qituvchilar esa ikkinchi qavatda qolib ketgan chiqindilarni, pastdagi chiqindilarni tashishga majbur bo‘lyapmiz. Opaga bu xatti-harakati noqonuniy ekanini aytib, shikoyat qilsak, ‘men deputatman, qolaversa, ortimda viloyat Xalq ta’limi boshqarmasi boshlig‘i va tuman hokimi turibdi deya’, unga hech kim qarshilik ko‘rsatolmasligini aytmoqda”, — deydi Umarali Avazov.
Matematika fani o‘qituvchisi Umarali Avazovning ma’lumot berishicha, maktabda 150 nafarga yaqin pedagog faoliyat yuritadi.
“Majburiy mehnatga jalb qilinganlar orasida pensiya yoshiga yetib qolgan, og‘ir mehnatdan toliqib qoladigan o‘qituvchilar ham bor. Ammo direktor opa bunga e’tibor ham bermayapti”, — deydi shikoyatchi o‘qituvchilar.
“Daryo” muxbiri bilan muloqotda bo‘lgan Umarali Avazovning aytishicha, Xolbek Boboniyozov, Oybek Yo‘ldoshev, Jobir Qurbonov, Husan Berdiyev, Alisher Ochilov, Umid Raupov kabi o‘qituvchilar majburiy mehnatdan jabrlanayotganini aytib, mas’ul tashkilotlarga rasm hamda video yuborgan. Ammo hech qaysi tashkilot vaziyatga e’tibor qaratmagan.
“Hozircha hech kim o‘rganmayapti. Biz esa direktorning qilmishi noqonuniy ekanini aytib, unga buni tushuntirolmay sarsonmiz. Ishlamasak, bir soat ham dars bermasligini aytgan direktor unga hech kim to‘sqinlik qilolmasligini takrorlamoqda”, — deydi murojaatchi o‘qituvchilar.
Mazkur vaziyatga munosabat bildirgan viloyat Xalq ta’limi boshqarmasi ishchi guruh tuzilib, vaziyat mutasaddilar ishtirokida o‘rganilgandan so‘ng maktab direktorining xatti-harakatiga qonuniy baho berilishini ma’lum qilgan.
“Qashqadaryo viloyati Xalq ta’limi boshqarmasi tomonidan holat yuzasidan o‘rganish ishlari olib borilayotganligini ma’lum qilamiz”, — deydi boshqarma axborot xizmati rahbari Javohir Rustamov.
Eslatib o‘tamiz, majburiy mehnatga yo‘l qo‘ygani aytilayotgan deputat — direktor Feruza Ahmedova internetda sud qarorini muhokama qilgan deputatlardan biri sifatida tilga olinib, jurnalistning “sud qarorini nega muhokama qilyapsiz, axir sud qarori O‘zbekiston Respublikasi nomidan o‘qiladi-ku”, degani savoliga “Qaror qanday qilib O‘zbekiston Respublikasi nomidan chiqar ekan, o‘zimizning Qarshi tuman Ma’muriy sudi ko‘rib chiqqan-ku”, deya javob berib, ko‘plab muhokamalarga sabab bo‘lishi bilan tanilgan. Shuningdek u “Siz jurnalistlar noto‘g‘ri xabar tarqatib, hokimiyatga ishonchsizlik uyg‘otyapsiz”, deya jurnalistlarni yolg‘on axborot tarqatishda ham ayblagan.
Izoh (0)