AQSh tarixida birinchi marta mamlakatning oq tanli aholisi kamaydi. Buni AQShning 2020-yildagi aholini ro‘yxatga olish byurosi ma’lumotlari tasdiqlamoqda.
Ma’lumotlarda ko‘rsatilishicha, mamlakatdagi oq tanli aholi 204 milliongacha kamaygan. Bu holat 1790-yildan beri birinchi marta sodir bo‘lgan.
2020-yilgi aholini ro‘yxatga olish yakunlariga ko‘ra, oq tanli aholi ulushi birinchi marta 60 foizdan kamroqni tashkil etdi. Ularning soni 2010-yildan buyon 8,6 foizga kamaygan.
O‘tgan o‘n yil ichida AQShning umumiy aholisi soni 7,4 foizga o‘sib, 331 million kishiga yetdi. Qayd etilishicha, o‘sish sur’ati 1930-yillardan beri eng past.
Hisobotga ko‘ra, umumiy o‘sishning yarmidan ko‘pi AQShdagi Lotin Amerikasi aholisining ko‘payishi hisobiga to‘g‘ri keladi. Ularning soni 2020-yilda 62,1 million kishiga yoki umumiy aholining 18,7 foiziga yetgan.
Bundan tashqari, kelib chiqishi osiyolik bo‘lgan Amerika aholisi soni 35 foizga o‘sib, 24 millionga yetgan va ular AQSh aholisining eng tez o‘sadigan segmentiga aylangan. Afroamerikaliklar soni esa 5,6 foizga o‘sgan, ammo ularning AQSh umumiy demografik tuzilmasidagi ulushi eski darajada saqlanib qolgan — 12,1 foiz.
Ba’zi demograflarning ta’kidlashicha, oq tanlilar soni qisqarmayapti, balki ularning ko‘pchiligi ko‘p irqli identifikatsiyaga o‘tyapti. O‘zini ikki yoki undan ortiq irq vakili deb ataydiganlar soni uch barobardan ko‘proqqa oshdi — 2010-yilda 9 million bo‘lgan bo‘lsa, 2020-yilda 33,8 millionga yetgan. Hozir ular AQSh aholisining 10 foizini tashkil qiladi.
“Bu o‘zgarishlar kim amerikalik ekanini tushunishning yangi usullarini talab qiladigan yangi turdagi identifikatsiyaga olib kelishi mumkin”, — dedi Nyu-York universiteti sotsiologi, amerikalik Enn Morning.
Har o‘n yilda bir marta o‘tkaziladigan hisob-kitoblar kelasi yilgi oraliq saylovlar oldidan saylov okruglarini aniqlash uchun ishlatiladi.
Izoh (0)